Maluk Tiger Christoffersen kalaallini sulorartartuni siullersaalluni Danmarkimi badmintonligami unammisalissaaq
Timersuummut tunniusimaneq sungiusartuarnerlu.
Oqaatsit taakku qitiusunut ilaapput kalaallimut sulorartartumut Maluk Christoffersenimut Danmarkimi kakkanrnerpaat unammineranni badmintonligami ukiumi unammiffiusumi tullermiit unammisalersussamut. Kalaallimik sulorartartumik Danmarkimi taama qaffasitsigisumik aatsaavissuaq unammisartoqalerpoq. Danmark nunani tamalaani qaffasissumik inissisimammat pisoq angisuujuvoq.
1. divisionimi suloraq sukkaqaluni ingerlasareersoq ligami unamminerni suli sukkanerusartussaavoq.
- Soorunami sukkanerujussuussaaq. Uani ukiumi unammiffiusumi 1. divisionimi aatsaat unammisalerpunga tassanilu sukkasoorujussuarmik ingerlasarput. Taamaattumik sungiussiniaqqaartussaavunga, Maluk Tiger Christoffersen oqarpoq.
- Unamminerit siulliit sungiussiniaqqaarumaarpunga. Takkutissaqqaarporli.
Sunniuterpassuit
Maluk Tiger Christoffersen ullumikkut killiffimminut piniarnermini imminut piumaffigisaqaaq. B-67-mi Nuummi sulorartaleqqaarpoq inuusuttuaraallunili Danmarkimut aallarpoq atuaatigaluni sulorarneq pimoorullugu aallunniarlugu.
- Danmarkimut taamani nuukkama manna eqqarsaatigisimanngivippara. Taama qaffasitsigisumi unammisalernissara eqqarsaatigisimanngilara. Taama periarfissinneqarama: Ingasarujussuarpoq, Maluk Tiger Christoffersen oqarpoq.
Qaffasinnerusumut inissinneq sunniuteqartussaavoq.
Nunanut allanut unammisartuniippoq nunanilu tamalaani unammisarnermigut pointinik katersivoq nunani tamalaani suli qaffasinnerusumik unammisinnaalerniarluni.
- 1. divisionimi unammisareernera nunanilu allani unammisarnikka misilittakkatigut pingaaruteqarput. Neriuppunga maanna aamma misilittakkanik pissarsilluarumaarlunga nunanut allanut unammisartoqatinnut aamma ingerlateqqissinnaasannik, Maluk Tiger Christoffersen oqarpoq.
Nunatsinni poorskimi pissartanngorniuttoqarmat Ilulissaniippoq angutit iligiiaarneranni Taatsi Pedersen JBF Ilulissaneersoq pissartanngoqatigaa kiisalu arnat angutillu akuleriinnerani Sara Lindskov Jacobsen sulorartartut kattuffiat BKN sinnerlugu unammisoq pissartanngoqatigaa. Taanna Maluk Christoffersenitut Danmarkimi najugaqarami BKN sinnerlugu unammivoq.
