Nalunaarusiaq Eqqartuussisoqarfiit kattunneqartariaqarput
Eqqartuussiviit aalajangiinerminni kukkuluttorpallaartartut taavalu inatsimmut eqqartuussisareernernullu naapeertuutinngitsunik pineqaatissiisartut Eqqartuussissuserisut Siunnersuisoqatigiivi nalunaarusiaminni, Kalaallit Nunaanni inatsisitigut isumannaassusermik qulequtalimmi inerniliipput.
Eqqartuussiviit suliaanni marlunni ilungersunartunik kukkusoqarsimasoq danskit tusagassiuutaannit Politikenimit aammattaaq allaaserineqarpoq. Kukkunerullu malitsigisaanik inuk pisuunngitsoq eqqartuussaasoq, allalu unnerluunneqartoq sumut pisuutinneqarsimanersoq aalajangerneqarsinnaanngimmat nunap eqqartuussisuuneqarfianit pinngitsuutinneqartoq allaaserineqarpoq.
Tunngavilersorluagaanngitsoq
Taamaammat eqqartuussiviit ilisimasatigut, piginnaasatigut, sulisussaqarniarnikkullu nukittorsarneqarniassammata, eqqartuussisoqarfiit ataatsimut katinneqarnissaat siunnersuisoqatigiit innersuussutigaat.
Isornartorsiulli innersuussullu tunngavilersorluagaanngitsut Eqqartuussisut Peqatigiiffianni siulittaasoq isumaqarpoq.
- Suliarpassuatsinni pisut ataasiakkaannguit eqqaaneqarpasipput, Eleonora Steenholdt Mørch oqarpoq.
AAMMA ATUARUK Illersuisut akuerisat isornartorsiuineq isumaqataaffiginngikkaat
Innuttaasut qanimut sullinneqarnissaat salliutinneqartariaqartoq, taavalu pasineqartut unnerluutigineqartullu eqqartuussisoqarfimmi najukkaminnut qanittumiittumi eqqartuussisumut kalaallisut oqaluttumut sassarnissamut pisinnaatitaaffeqartariaqartut Eleonora Steenholdt Mørch isumaqarpoq.
Eqqartuussissuserisoq aamma isumaqataanngitsoq
Siunnersuisoqatigiit eqqartuussivinni sulinerup pitsaassusaata appasippallaarnerarlugu isornartorsiuutaat eqqartuussissuserisumit Ulrik Blidorfimit aamma isumaqatigineqanngilaq.
Eqqartuussivinnni pinerluttulerinermik suliaqarnermi qaqutigoortumik kukkusoqartartoq Ulrik Blidorf Eqqartuussissuserisut Siunnersuisoqatigiivisa Katuami pingasunngormat oqallitsitsineranni oqarpoq.
- Eqqartuussutit ikittuararsuit suliareqqeqqusarpagut, Ulrik Blidorf ilaatigut oqarpoq.
AAMMA ATUARUK Danmark akisussaasuuvoq
Eqqartuussissuserisut kalaallisut oqalussinnaasualunnguit ilagimmanni pinerluttulerinermik suliani illersuisuusartupilussuugami, eqqartuussivinni sulinermut ilisimasaqarluarluni Blidorf nassuiaavoq.
Eqqartuussiveqarfiillu katiternagit piginnaanertusarneqartariaqartut, taanna isumaqarpoq.
Kukkunerillu pinngitsoortinniarlugit eqqartuussisut ilinniartinneqarnerunissaat siunnersuisoqatigiit innersuussutigaat.
Eleonora Steenholdt Mørchip tamanna nuannaarutigigaluarlugu maanna pingaartinneqareersoq eqqaasitsivoq.
- Eqqartuussisut piginnaasaat qaffassarniarlugit ukiumoortumik ataatsimiittuaannarpugut, Eqqartuussisut Peqatigiiffianni siulittaasoq Eleonora Steenholdt Mørch oqarpoq.
Nunatta eqqartuussisuunera isorinnittoq
Aamma Nunatta eqqartuussisuunera Søren Søndergaard Hansen Eqqartuussisuunerit siunnersuisoqatigiivisa oqallitsitsinerannut peqataavoq. Ulrik Blidorfimullu isumaqataalluni oqaatigaa, nalunaarusiamullu isornartorsiuivoq.
Eqqartuussissuserisut siunnersuisoqatigiivi suli aaqqissuutassamik nalilersuiniarsarisut Søren Søndergaard Hansen isumaqarpoq. Eqqartuussisutut atorfiit tamaarmik suli inuttalerneqanngitsut illersuisuunermillu suli atorfinitsitsisoqanngitsoq Nunatta eqqartuussisuunerata eqqaasitsissutigaa.
Illersuisuuneq, eqqartuussisut illersuisullu akuerisat Nunatta eqqartuussisoqarneranut qitiupput.
Inaarutaasumilli nalilersuinerunani alloriarnerusoq, Eqqartuussissuserisullu Siunnersuisoqatigiivisa aaqqissuussap pitsaanerulernissaanut utaqqeqqaarnissaannut pissutissaqanngitsoq nalunaarusioqataasoq eqqartuussissuserisullu kattuffianni qullersaq, Torben Jensen, oqarpoq.
