Illersuisut akuerisat isornartorsiuineq isumaqataaffiginngikkaat

Illersuisut akuerisat Kalaallit Nunaanni inatsisitigut isumannaatsuuneq pillugu eqqartuussissuserisut siunnersuisoqatigiivinit isornartorsiorneqarput. Unnerluussissussaatitaasunit sanngiinnerupput, taamanneratalu  unnerluunneqartut inatsisitigut illersugaanerat ulorianartorsiortippaat.

Illersuisut akuerisat peqatigiiffianni siulittaasup Tom Ostermannip taama oqartoqarnera isumaqatiginngilaa.

- Isumaqarpunga naapertuuttumik illuatungeriit oqimaaqatigiissumik inissisimasartut, Tom Ostermann oqarpoq.

IA llersuisut unnerluussisussaatitaasunit sanngiinnerusumik inissisimasut

Eqqartuussissuserisut siunnersuisoqatigiivi nalunaarusiaminni nunatsinnni inatsisitigut isumannaatsuuneq allaaserivaat, suleqatigiissitallu maluginiarsimagaat illersuisut akuerisat pisinnaasaat appasinnerusartut  illersuisullu akuerisat unnerluussissaatitaasunit sanngiinerusartut.

Danskit aviisianni Politikenimi suliat assigiinngitsut marluk allaaserineqarmata, illersuisut akuerisat illersuinerminni kukkorujussuarsimanerat sammineqarpoq.

Assersuutigineqartulli allaavigalugit illersuisut akuerisat suliaat ataatsimut taama oqatigineqarsinnaanngitsut,Tom Ostermann illersuisutut ukiuni kingullerni arfineq-marlunni sulisuusoq isumaqarpoq.

- Assersuutitut qaqinneqartoq eqqaassanngikkaanni qaqutigorujussuaq taama pisoqartarunarpoq. Uanga tamanna pisimasoq tusagassiutitigut aatsaat tusarpara, Ostermann oqarpoq.

Ostermann: Nuna tamakkerlugu illersuisoqalernissaq pisariaqarpoq

Nalunaarusiami innersuussutigineqartut naapertorlugit illersuisut atugaasa ajunnginnerulernissaannik oqariartuut Tom Ostermannip isumaqatigaa, assersuutigalugu nuna tamakkerlugu illersuisoqalernissaq nalunaarusiami innersuussutigineqarmat.

Nuna tamakkerlugu illersuisartussap ilinniartittartussaavai taakualu suliai nakkutigisaralugit.
 
- Malunnarami akuerisatut illersuisut suliaannik nalilersuisartussatut inissittussaammat, taannalu isumaqarpunga aamma qulakkeerinnittussaasoq uagut akuerisatut illersuisutut atorsinnaanitsinnut aammalu naapertuuttumik suleriaaseqarnitsinnut takutitsisuusussaq, Illersuisut akuerisat peqatigiiffianni siulittaasoq Tom Ostermann oqarpoq.

Eqqartuussissuserisut siunnersuisoqatigiit innersuussutigisaat, tassalu illersuisut akuerisat ilivitsumik atorfittut  atuutilersinneqarnissaa, Tom Ostermannip isumaqatigaa.

- Tamakkiisumik piffissamik suliffittut aaqqinneqarnissaa aqqutissiuunneqartariaqarpoq, taannalu aamma uagut peqatigiiffimmi ukiut marluk sinnerlugit maannakkumut anguniarsaralugu suliniutiginikuuarput, Tom Ostermann oqarpoq.

Danskit inatsisinik atortitsinermut ministeriat Søren Pape Poulsen KNR-ip oqaaseqartinniaraluaramiuk suli iluatsinngilaa.

Kalaallit Nunaanni inatsisitigut isumannaatsuunissaq pillugu nalunaarusiami makkua innersuussutigineqarput:

• Eqqartuussiviit ataatsimoortinneqassapput, illersuisut akuerisat  piginnaasaat qaffassarneqassapput nakkutigineqalerlutillu. Aamma pillaagaanermi allamik qinigassaqalisaaq, soorlu niukkut kalunnilersitsinikkut.   Eqqartuussisusserisut siunnersuisooqatigiivisa nalunaarusiaminni innersuussutaasa ilaat taamaapput. 

• Sumiiffinni eqqartuussiviit, maanna sisamaasut, ataasiinnanngortinneqassapput, eqqartuussisut ataatsimoortinnerini sulianut pikkorissusaat qaffassarniarlugu.

• Sumiiffinni eqqartuussiviit ilitsersorsinnaaniarlugit Nunatta Eqqartuussisuuneqarfianut aningaasaliissutit amerlineqartariaqarput, taamaattumillu nalunaarusiaq naapertorlugu Nunatta Eqaartuussisuuneqarfiani eqqartuusisut ataatsimik ilaneqartariaqarpoq.

• Sumiiffinni eqqartuussivinni, Nunatsinni eqqartuussivimmi Kalaallit Nunaatalu eqqartuussisuuneqarfiani eqqartuussisut allaffissornikkut oqilisaaviginiarlugit IT-mik aaqqissussinerit, Danmarkimi aaqqissuussaanermut naapertuutsilerlugit nutarterneqassapput. Aqutsinermi sulisut oqalutsillu amerlineqassapput.

• Inatsisilertooqatigiinnik aalajangersimasunik, Kalaallit Nunaanni eqqartuussisoqarneq pillugu ilisimasalinnik, toqqaasoqassaaq. Sumiiffinni eqqartuussiviit malinnaasinnaajunnaaraangata taakkua ikiuuttassapput.

• Nunatsinni illersuisuunermik , illersuisunik ilinniartitsisinnaasumik siunnersuisinnaasumillu, piaarnerpaamik atorfinitsitsisoqassaaq. Taanna aamma illersuisunik nakkutilliisuussaaq.

• Illersuisutut atorfik saniatigut suliffiuinnarunnaarsillugu qaffassarneqassaaq. Illersuisut unnerluussisuutitaasutulli naleqaasuseqalersillugit qaffassarneqassapput, taamnaalilluni inatsisitigut isumannaassuseq qaffassarneqarluni.