Assi: KNR / Paarnaq Hansen

Sara Olsvig: Danmark akisussaasuuvoq

Eqqartuussiveqarneq nunatsinnit akisussaaffigineqalersimatinnagu, tamatuma Danmarkimi eqqartuussiveqarnermit ajornerunnginnissaanut Danmark akisussaasuuvoq.

Eqqartuussissuserisut siunnersuisoqatigiivisa nalunaarummi nunatsinni eqqartuussinerit equngasoqarnerareeraat Sara Olsvig naqissusiivoq.

Nunatsinni eqqartuussiveqarnerup pitsaanerulernissaanut Danmarkip akisussaaqataanini naammassisariaqarpaa.

- Inatsisitigut isumannaassuseq equngasortaqartoq nalunaarusiami inerniliunneqareersorlu inatsisinut atuutsitsinermut naalakkersuisoq, Sara Olsvig, oqarpoq.

- Danskit annertuumik uani suli suliassaqarput, Sara Olsvig oqarpoq, erseqqissaatigalugulu danskit politikerisa inatsiseqarnikkut nunatsinni atuuttut isumaginerusariaqaraat.

Inatsiseqarnermut ministerip iliuuseqarnissaa piumasaqaataavoq

Nunatsinni inatsisitigut isumannaassuseq equngasortaqartoq, nalunaarusiami saqqummiunneqaqqammersumi eqqartuussissuserisut siunnersuisoqatigiit inerniliipput.

Nunatsinnilu eqqartuussisoqarnerup Danmarkimi eqqartuussisoqarnertut pitsaatigilertinnissaanut Danmarki akisussaaffeqartoq, Sara Olsvigip periarfissami siullermi inatsisinut atuutsitsinermut ministerimut, Søren Pape Poulsenimut, eqqaasitsissutiginiarpaa.

- Oqarsinnavugullu, nunatsinni eqqartuussiveqarneq suli taamatut inisseqqajanngilaq.

AAMMA ATUARUK Inatsisitigut innarlitsaalisaaneq equngasortaqartoq

Illersuisut akuerisatut ilinniagaqarsimanngitsut ullumi atorneqartarput.

Naliginnaasumillu unnerluussisuusut politiininngaanniinngikkunik inatsisilerinermut tunngasunik ilinniagaqarsimasuusarput, taamaasillutillu nunat tamalaani illua tungeriit naligiittunik sinniisoqarnissamik isumaqatigiissutigineqartut malinneqarneq ajorlutik.

- Illersuisut ullumikkut suliffimmik saniatigut illersuiuusarnerat nunatsini ullltsiunni atukkanut ilumut tulluartuunersoq qiviaqqittariaqarparput.

AAMMA ATUARUK Innuttaasut inatsisitigut isumannaassusaat aarlerinartoq

Nunatsinni illersuisuunerup eqqartuussivinni isumannaassuseq qulakkiissavaa

Illersuisut pinerluttulerinermik suliani sunniuteqarnerusinnaanissaat qulakkeerniarlugu Nunatsinni illersuisuunertut atorfik inatsisinik atuutsitsinermut ministereqarfimmit inuttassarsiorneqareerpoq.

Atorfimmi tassani ukiumut 800 timini sulisoqartassaaq, tamannali ima allanngortinneqartariaqartoq Sara Olsvig isumaqarpoq:

- Nuna tamakkerlugu illersuisussap tamakkiisumik suliamik taassuminnga kivitsisinnaanissaa aamma tamakkiisumik piffissarlu tamakkerlugu sulisinnaanissaa, Inatsisinik atuutsitsinermut naalakkersuisoq, Sara Olsvig oqarpoq.

Taassuma danskit inatsisinik atuutsitsinermut ministeriat decembarip aallartinnerani naapissavaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat