Toqutsisimasutut unnerluutigisaasoq pinngitsuunerartoq

Angut 42-nik ukiulik Nuummi angummik 20-nik ukiulimmik, 2024-mi toqutsisimasutut pasisaalluni Eqqartuussiveqarfik Sermersuumi ullumi sassartinneqarpoq.

Angut pinngitsuunerarpoq suliamilu oqaaseqarumanani. Unnerluussisussaatitaasullu isumaa naapertorlugu, angutip 42-nik ukiullip angut 20-nik ukiulik oktobarimi 2024-mi toquppaa.

Unnerluussisussaatitaasup Aprilia Jespersenip tamanna eqqartuussivimmi suliaq aallartiinnartoq aalajangiusimavaa.

42-nik ukiullip ipai, toqutaasumi, sumiiffimmi quimi sumi tamaanilu 2024-mi oktoberip ulluisa sisamaanni nassaarineqarmata, tamatumunnga pissutaavoq.

Kisianni angut 42-nik ukiulik toqutsisimasutut pinngitsuunerartoq, eqqartuussivimmilu pinngitsuutinneqassasoq, 42-nik ukiulimmut illersuisup eqqartuussivimmi nalunaarutigaa.

Tamanna unnerluussisussaatitaasup angutip pasineqartup Danmarkimi tarnimikkut nappaateqartunut inissiisarfimmut inissinneqarnissaanik piumasaqaataanut akerliuvoq.

DNA sumiiffinni arlalinni nassaarineqartoq

Eqqartuussinermi ullormi siullermi arlaleriarluni unnerluussisoq assinik assigiinngitsunik saqqummiussivoq, isumaqarami 42-nik ukiullip toqutsisimasutut suliami, pisuuneranik takussutissaasut pingaaruteqartut.

Angut unnerluutigineqartoq eqqartuussivimmi eqqissisimasutut issiavoq, eqqartuussinerup nalaani aalarpiassanani. Niuili uniffeqaratik akutsoqatigiissaanngitsumik aalapput, sajulluni issialluni.  

Unnerluussisoq DNA-mut tunngasunut apuummat, misissuinerit pinerlunnermi tekniskiusut unnerluutigineqartup DNA-va sumiiffinni arlalinni nassaarineqarsimasoq takutippaat , tamannalu uppernarsaanissamut pingaaruteqartoq erseqqissaatigineqarpoq. 

Ullumi nalunaaqutaq ataatsimut ilisimannittoq nassuiaateqartinneqassaaq.

Unnerluutigineqartup angut 20-nik ukiulik niaquatigut arlaleriarluni anaalerpaa, taamaalilluni 20-nik ukiullip ajoqusernini toqqutigaa.

Angut toqutsisimasutut pineqaatissinneqareersimavoq, unnerluussisussaatitaasoq oqaluttuarpoq.

Ilisimannittoq siulleq ilaqutaasoq

Ilisimannittoq sassartinneqartoq siulleq unnerluutigineqartup ilaqutaraa. Angut 42-nik ukiullip tigusarineqannginnerani sapaatip akunnera sioqqullugu taassuma kingullermik takusimagaa taanna oqaluttuarpoq.

- Tupigusuppunga, tassami ullut tamaasa pulaartarpaatigut, ilisimannittoqoqaluttuarpoq.

Ilisimannittup oqaluttuarnera naapertorlugu, angut 42-nik ukiulik ilagalugu sissamut sapaammi pisuttuarsimallutik, angullu nalinginnaasumik pissuseqartoq kingullermik ilagalugu oqaluttuarpoq.

Affarmik qatanngutaa eqqartuussivimmi ilisimannittutut oqaaseqartoq

Ilisimannittut sisamaat ullormilu eqqartuussinermi ilisimannittutut nalunaajaasoq kingulleq, unnerluutigineqartup affarmik qatanngutigaa. 42-nik ukiulik qanigisarilluinnaramiuk oqaaseqarnissaminut pisussaaffeqanngitsoq eqqartuussivik oqarpoq. Nalunaajaanissanili kissaatigaa.

Unnerluutigineqartup 42-nik ukiullip oktobarip 12-ianni tigusarineqarnissami tungaanut najorsimagaa taanna oqaluttuarpoq.

- Politiit tigusariniarlugu takkummata aperaakka susoqarsimanersoq, akineqanngilangali, isigivaanngali qungujulalluni, arnaq eqqartuussivimmi oqaluttuarpoq.

Arnap eqqartuussivik qimannginnerani unnerluutigineqartumut qiviarpoq.

- Bye, attortissimalaarluni taanna oqarpoq.

Eqqartuussiviup ullumikkut eqqartuussineq naammassivaa, suliarli aqagu marlunngornermi nangeqqinneqassaaq, ilisimannittut arlallit nassuiaateqassallutik.