Politiit ullormut nalunaarutaat: Politiit sapaatit akunnerata naanerani ulappussimasut

Kalaallit Nunaanni Politiit sapaatit akunnerata massuma naanerani ulappussimallutik, Kalaallit Nunaanni politiit sillimasuisa pisortaata oqaatigaa.

Allattoq Mads Lynge

apriilip 19-at 2026 16:23

Suliassat amerlanerit imigassartortoqarsimaneranut tunngasut politiit nalunaarutigaat, nakuusernerit katillugit qulingiluat suliassarineqarsimallutik.

- Ulapiffiuvoq, imigassartornermut tunngasut suliassat arlallit suliarisimavagut. Sineriak tamakkerlugu qiviassagaanni takusinnaavarput nakuusernerit qulingiluat politiinit orniguffigineqartariaqarsimasut, Kalaallit Nunaanni Politiit sillimasuisa pisortaat Malik Olesen KNR-imut oqarpoq.

Nakuusernerit ilaanni savilersortoqarpoq, Sisimiuni unnuaq savilersortoqarluni:

- Nakuusernerit qulingiluat akornanni ataaseq immikkuullarippoq, savilersortoqarneranimmi saaffiginnissut unnuaq marlunut qiteqqqunnerata missaani tiguarput, Malik Olesen oqarpoq, nangillunilu:

- Angut 30-t missaannik ukiulik savimmik kapineqarpoq, arnaq 20t missaannik ukiulik tassunga atatillugu tigusarineqarpoq pasineqarlunilu. Arnarli iperagaavoq, suliarlu suli ingerlalluni. Kingusinnerusukkut eqqartuussaajumaarpoq, Kalaallit Nunaanni Politiit sillimasuisa pisortaat Malik Olesen KNR-imut oqarpoq.

Politiit sapaatit akunnerata massuma ingerlanerani suliassaat amerlanerit imigassartorsimanermut tunngassuteqarput, tassa nakuusernerit eqqissiviilliornerillu assigiinngitsut.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.