Sivikinnermik sulisarnissatsinnut anguniagaq suli taamaatinneqanngilaq

Sapaatit akunneranut sivikinnerusumik sulisassagutta pitsaanerussava?

Naalakkersuisut Inatsisartunilu amerlanerussuteqartut apeqqut taanna akissutissarserusuppaat.

Demokraatineersup Karen Marie Kyed Frederiksenip siunnersuutaa tamatumunnga aallaaviuvoq.

Demokraatimmi sapaatit akunneranut suliffik nalunaaquttap akunneranit 40-nit 35-inut imaluunniit 37-inut sivikillisikkusuppaat.

- Suliffiup appartinneqarnerani neriuutigigatsigu inuunerinnerulernissaq, sulinermi nuannaarnerulernissaq minnerunngitsumillu work life balancep pitsanngorsarnissaa meeqqat ilaquttallu piffissaqarfigalugit, Karen Marie Kyed Frederiksen oqarpoq.

Piffissamili qaninnerpaami sivikinnerunermik sulisalernissarput ilimananngilaq.

Demokraatimmi suliffik sivikinnerulertissaguni qanoq iluaquteqassanersoq ajoquteqassasorlu misissorteqqaarusuppaat.

Ulapinnerulersitsisinnaasoq 

Peqqinnissamut naalakkersuisoq Anna Wangenheim naalakkersuisunngunnginnermini 2024-mi siunnersuuteqartuuvoq, suliarlu taanna parteeqataata Karen Marie Kyed Frederiksenip ingelateqqippaa.

Naalakkerusisut qitiusumik politikkikkut aningaasaqarnikkullu ilisimatusarnermut ingerlatsiviup CEPR-ip misissuineranut siusinnerusukkut innersuussipput.

Amerlanerusut sulilersinniarlugit sivikinnerusumik sulisalernissamut politikkit ingerlatsiviup siornatigut misissuiffigai. 

Sapaatilli akunneranut suliffinnik sivikinnerulersitsineq sulisut amerlanerulernissaannik sunniuteqartariaqanngimmat, sulisut naammassisassaminnut ulapinnerulersinnaasut, misissuinermi inerniliunneqarpoq.

Tamanna nunatsinni attuumassuteqarpoq, naalakkersuisummi nalunaarusiaat naapertorlugit nunatsinni sulisinnaasut siunissami ikiliartussapput.

- Suliffeqarnermi immikkoortuni arlalinni sulisussaaleqineq pioreersoq naluneqanngilaq. Nalunaaquttap akunneri suliffissat ikinnerusut sulisut amerlassusiat nikisinnagu, suliffeqarfiit suliamik naammassisaqarsinnaassusiata apparneranik kingunerisinnaavaa, pingaartumik amerlanerusut sulilinngippata, Naalakkersuisunit oqarput.

Misissuinerup inernera 2027-p naanerani agguaanneqarnissaa siunnersuutigigaat

Apeqqutilli ilaat suli akissutissarsineqanngimmata, Demokraatit misissuinissamut siunnersuutaat naalakkersuisut akuersaarpaat.

Nunatsinni sapaatit akunnerani suliffissat nalunaaquttap akunnerinik 35-nik 37-nilluunniit sivisussuseqassaguni qanoq sunniuteqassanersoq pillugu misissuinissaq, Naalakkersuisut siunnersuutigaat. 

- Sulinerup sivikillineqarnera inuiaqatigiit aningaasaqarnerannut, sulisarnermut tunngasunut, naligiissitaanermut aammalu inuussutissarsiornermi immikkoortortaqarfinnut qanoq sunniuteqassanersoq misissorneqassalluni, Naalakkersuisut allapput.

Inernissaali suli utaqqeqqaartariaqassavarput. Naalakkersuisummi misissuinerup inernerata Inatsisartunut 2027-p naanerani saqqummiunnissaa siunnersuutigaat.

Taamalu siunnersuuteqarnerat Inatsisartuni amerlanerussuteqartut akuersissutigaat.

Siunnersuutip Inatsisartunit sisamanngorpat apriilip ulluisa 23-anni naammassillugu oqaluuserineqarnissaa pilersaarutaavoq.