“Naggueqatigiissutsikkut assigiinngisitsineq uumassusilerinermut tunngatinneqartuusaartoq": 'Uagut' Borgernes Partimi ilaasortaq naqqikkaa

Borgernes Partimi ilaasortaq Rasmus Munch Søndergaard aperigaanni, inuup sananeqaatai danskiussusermut aalajangiisuupput.

DR-ip aallakaatitassiaani Deadlinemi marlunngornermi aallakaatinneqartumi taama oqarpoq. 
Rasmus Munch Søndergaardip oqarnera naapertorlugu inuup sananeqaataatigut kingornuttagai kulturilu imminnut attuumassuteqarput – tamannalu uppernarsarniarlugu DNA-mik ilisimatuup nunarsuarmi tusaamasap Eske Willerslevip misissuinera atorpaa.

Eske Willerslevip ilisimatusarnini tamatumunnga tunngatillugu DR-imi aallakaatitassiami atorneqarsinnaannginnerarpaa.

Oqaatigineqartoq aalajangersimasoq ataaseq 'Uagut', kalaallit Danmarkimi kattuffiannit, qisuariarfigineqarpoq.

Rasmus Munch Søndergaardimmi “inuk, immuk saperamiuk immuttorumaneq ajortoq" ilaanni peerarisimasimanerarpaa.

- Sananeqaatsimigut saperpaa, Rasmus Munch Søndergaard oqarpoq.

'Uagut'-mi pisortap Julie Rademacherip oqarnera naapertorlugu, kalaallit apersuinermi assersuusiarineqarnerat annernarpoq.

- Immuup akuanik laktosemik sapigaqarnerup kikkut Danmarkimut atanerannut ippassaq unnukkut tamanut aallakaatitsinermi ersersitsisuunerarneqarpoq. Aap, kalaallit immummik sapigallit amerlapput. Danskerpassuilli allat aamma taamaapput. Inuttut qanoq ittuunitsinnut imaluunniit sumut atanitsinnik ersersitsisuunngilaq.

- Laktosemik sapigaqannginneq aallaavigalugu danskiussutsimik ersersitsineraasup qanoq ittuuneranik takutitsiinnarpoq. Ilisimatuussutsimut naapertuutinngilaq. Tassaaginnarpoq naggueqatigiinnik immikkoortitsiniarneq uumassusilerinermut tunngatinniarneqartuusaartoq, Julie Rademacher tusagassiuutinut sisamanngornermi nalunaarummi oqarpoq.

Ulorianartuusoq

Taamaattumik oqaaserineqartut "Uumassusilerinerup akuerineqarnissamut misilitsinnertut atorniarsarineqarnera“ kattuffitsinnit akuerinngilluinnarparput, Julie Rademacher nangilluni oqarpoq:

- Oqaluttuarisaanermut tunngasut eqqarsaatigalugit navianarpoq. Inuit akornanni tatiginnikkunnaartitsisarpoq. Aamma taama oqarneq kalaallit inuillu kisimik eqquinngilaq, danskip qanoq isikkoqarneranik, nipeqarneranik nerisanillu arrortitsisarneranut aalajangersimasumik isiginnittaatsimut tulluarsorineqanngitsunut tamanut eqquivoq.

Julie Rademacherimmi oqarnera naapertorlugu kalaaliullunilu danskiusoqarsinnaavoq.

- Kalaaliullutalu danskiuvugut. Ataatsikkut. Danmarkimi najugaqarlutalu sulisarpugut akileraartarlutalu, meeqqavullu danskisut atuarput. Inuiaqatigiinnut matumunnga ilaavugut, imaanngitsoq tunuliaqutigut assigiinngikkaluartulluunniit tunuliaquterpulli tunuliaqutigalugu, taanna oqarpoq.

'Ukiut tusindilikkaat siulianni oqaatigineqareersunut eqqaasitsineruvoq'

Inuit Ataqatigiit Folketingimut ilaasortaatitaata Naaja H. Nathanielsenip Rasmus Munch Søndergaardip oqaaserisai Facebookimi aamma isornartorsiorpai.

- Tamat oqartussaaqataaffigisaanni politikerip inuup sananeqaatai aallaavigalugit kinaassutsimik kulturimillu tunuliaqutaqartitsiniarnera eqqunngitsuuvoq. Tunngavilersuutigissallugu kukkuneruvoq, soorluttaaq immummik sapigaqarneq piorsarsimassutsitsinnut sunniuteqangaarnavianngitsoq, taanna oqarpoq.

Naaja H. Nathanielsen nangilluni allappoq ’imminut qanoq isigineq’ upperalugu - allallu kina kalaaliunersoq, danskiunersoq inuiaqatigiinnulluunniit allanut ilaanersoq aalajangersinnaanngikkaat.

- Inuullu sananeqaataa pillugu oqallinneq, tamatuminnga isumaliutersuummik iluatsinngitsoortumut ukiut tusindilikkaat siulianni oqaatigineqareersunut eqqaasitsineruvoq, Naaja H. Nathanielsen oqarpoq.

Rasmus Munch Søndergaard eqqartuussissuserisuuvoq Borgernes Partimullu ilaasortaalluni. Folketingimut ilaasortatut qinigaanngilaq.