Pakistanimi Talebanit qaartartumeerisaqattaarniarput
Islamabadimiit 35 kilometerisut ungasitsigisumi sakkuliorfissuarmi sulisut tuusintillit anialeruttortut, imminnut toqoriaatigalutik qaartartumeeriniartut marluk kikiattalinnik qaartitsimmata inuit eqqorneqartut amerlaqaat. Ikilerneqarsimasut aaginnaat ilaqutaallu nilliasut, allallu toqusut inaanni ilaquttaminnik kinaassusersiniaasut kingorna TV-kkut aallakaatitami takuneqarsinaapput. Al Qaedameersut Talebanillu tassani suliffissuarmi sulisut 25.000-it ajornannginaarlugit eqqorniartarpaat. Qaartitsisoqarsimatsiartorlumi Talebanit akisussaasuullutik nalunaarput. Taakkualu oqaaseqartitaat oqarpoq sakkutuut nunap avannaata kippasinnerusortaaniittut tunuartinngippatigit qaartartumeeriuassallutik. Tamanna Islamisiortut pissaaneqarfigaat, qangalilu sharia naapertorlugu aqutsileramik niviarsissat atuarfii matoorarpaat, naalakkersuisullu sinniisuinik atorfilittaannillu tamaaniittoqarani.
Qaartartumeerineq pivoq naalakkersuisut isumaqatigiissinnaanatik, Benazir Bhuttop uia kisermaassilersinniarlugu qunusaaraluni illuatungiliuttut siuttuat, Nawar Sharif tunuaannarniarluni oqaluleruttortoq. Musharraf tunuarmat eqqartuussisuunerit soraarsinneqarsimasut atorfinitseqqineqassanersut illuatungeriit isumaqatigiinngissutigaat, taassumalu saniatigut kina præsidentinngussanersoq isumaqatigiissutigisinnaanaviarnagu. Musharraf maanna tunuareermat illuatungeriit pisuutitassaarukkamik isumaqatigiinngissutaat sakkortunerusumik ersertalissasut alapernaatsunit ilimagineqarpoq, taamaalillutillu Pakistanimi politikkikkut pissutsit ajorsiartuinnassallutik.
