Paatsooqatigiinneq peqatigiiffimmut millioninik naleqartoq
Ukiuni sisamani ukiumut 500.000 koruunit. Katillugit to millionit koruunit.
Peqatigiiffik Illorsuarmiunut danskit aningaasanut inatsisaannit ukiuni tulliuttuni sisamani aningaasaliissutissaraluit. Taakkuli iluatsinngillat.
Siumuts folketingimut ilaasortaatitaata Aki-Matilda Høegh-Damip qallunaat aningaasaqarnermut ministerianut Nicolai Wammenimut (S) aningaasaliissutaaniat isumaqatigiinninniarnermini iluatsikkaluarpai.
Karrat Kangerluanni piffiit pingasut aarlerinaateqartut
Nunatsinnit, Danmarkimit Norgemiillu ujarassiuut Karrat Kangerluani piffiit pingasut aarlerinaateqartutut oqaatigaat. Taakku qaqqami 2017-imi nakkaasoqarneranit tassaarsuaqartitsisumut qanittumiipput. Piffiit assimi normu 1, 2, 3-millu nalunaarsorsimapput. Piffik 3-mik nalunaaqutsersimasoq ataatsikkut nakkaassagaluaruni ajornerpaamik pisoqarsinnaavoq.
Aningaasaliinissaq Namminersorlutik Oqartussanit taperserneqanngimmat taamaatinneqarpoq. Peqatigiiffik Illorsuarmiut sinnerlugu isumaqatiginninniartup Aki-Matilda Høegh-Damip tupigusuutigaa.
- Illorsuarmiut nassuiaanneqartariaqartut isumaqarpunga, Aki-Matilda Høegh-Dam KNR-imut oqarpoq.
Uummannap sulluani 2017-imi tassaarsuaqareernerata kingorna Illorsuit inuerutsinneqarpoq. Peqatigiiffik Illorsuarmiut najugaqartuusimasunit kingorna pilersinneqarpoq.
Illorsuit maanna inoqanngilaq. Immikkut ilisimasallit naliliinerat malillugu Uummannap sulluani tassaarsuaqaqqinnissaa aarlerinaateqarpoq.
Taama naliliineq tunngavigalugu Illorsuit ammaqqinnissaa ulorianarpallaartoq oqartussat nalilerpaat.
Qallunaat aningaasanut inatsisissaannit Illorsuarmiut peqatigiiffiannut aningaasaliiniarnerup itigartitsissutaanera tassannga peqquteqarpoq.
Namminersorlutik Oqartussat naapertorlugit aningaasaliissutit Illorsuup ammariartorneqarnissaanut atorneqartussatut paasisimavaat.
Aningaasaqarnermut naalakkersuisoq Naaja Nathanielsen (IA) taama nassuiaavoq.
- Naalakkersuisuit Peqatigiiffik Illorsuarmiut aningaasaliiffigineqarnissaat itigartitsissutiginerattut isikkoqarnera inunnit paasiuminaatsinneqarnera paasisinnaavara. Taamatut nipeqarpasinnerput ajuusaarutigaarput, taanna oqarpoq, nangipporlu
- Illorsuarmi aaqqissuinernut nunaqarfiup ammaqqinnissaanut siunertaqartulliuku Naalakkersuisunit tapersinngikkivut. Piffik ulorianartorsiorfimmiimmat.
Aningaasat toqqissisimalersitsissasut
Nunaqarfiup ammaqqinnissaanut aningaasat atorneqarnissaannut siunertaanngitsut Aki-Matilda Høegh-Dam (S) oqarpoq.
Aningaasalliuku peqatigiiffiup suliannut ilaasortaanullu atorneqarniartussaagaluartut.
- Ikiortimik, taavalu inatsisilerituumik ikiorneqarnissamut. Suut pisinnaatitaaffigineraat, illuminnik pisataminnik annaasaqarnikuunerminnit arlaannik periarfissaqarnersut, suut uterteqqissinnaanerinik periarfissanik misissuisinnaasumut ikiorneqarnissaminnut, Aki-Matilda Høegh-Dam oqarpoq.
Tassunga Naaja Nathanielsen ima akivoq:
Najugaqarfiusut eqqugaanissaannut piffissaq ima sivisutigissaaq:
Karrat Kangerluanni aarlerinartunit pingasunit annerpaaq piffissami ataatsikkut nakkaassagaluaruni tamanna tassaarsuartitsinngaatsiarsinnaavoq. Tassaarneratalu nunaqarfinnut Uummannamullu anngunnissaanut piffissaq ima sivisutigissaaq:
- Nuugaatsiaq: 7 min. (najugaqartoqanngilaq)
- Illorsuit: 13 min. (najugaqartoqanngilaq)
- Niaqornat: 23 min.
- Qaarsut: 26 min.
- Uummannaq: 30 min.
- Saattut: 35 min.
- Ukkusissat: 26 min.
- Ikerasak: 38 min.
Paasissutissarsiffik: Naalakkersuisut
- Taama kissaateqarnerup iluatsinnginnera uggornarpoq. Peqatigiiffiup aningaasaliiffigineqarnissaa Naalakkersuisuniit akerlerinngilarput, nunaqarfimmiliuna pisussanik aaqqissuussinissaq tapersersinnaanngikkipput. Tassa akissuteqarnitsinni taanna tunngavigaarput. Aningaasat nunaqarfimmi pisunut siunertaqartutut paasigatsigu.
Aningaasat sumut siunertaqarnersut qallunaat aningaasaqarnermut ministeriaqarfianit nassuiarneqarnerat innersuuppaa.
Ministeriaqarfimmi atorfilik ima nassuiaateqarluni allappoq:
"Paasisakka naapertorlugit, Peqatigiiffik Illorsuarmiunut ukiuni tulliuttuni sisamani to millionit koruuninik aningaasaliisoqassasoq, Namminersorlutik oqartussat nunaqarfiup ammaqqikkiartuaarneqarnissaa siunertaralugu, siunnersuutigineqarput."
Paatsoortoqartoq
Siunnersuut pillugu Folketingip Naalakkersuisullu akornini attaveqaqatigiinneranni paatsooqatigiissutigineqarsimassasoq Naaja Nathanielsenip ilimagaa.
- Taakkua akornini paatsooqatigiittoqarsimanissaa ilimanarpoq. Illorsuarni pisussanut aningaasaliisoqassasoq uagut paasivarput, tamannalu tapersersinnaasimanngilarput. Peqatigiiffimmut aningaasaliisoqarniarnera tapersersorusunnartorujussuuvoq, ilaasortanullu aaqqissuussinerit Illorsuarmi pisussaanngitsut ajoriffissaqartinngilavut. Tassa paatsoorneq aallavigalugu taamaattoqartoq ugguarnarpoq.
Paatsooqatigiinnermut kina akisussaasuua?
- Oqaatigiuminaappoq. Isumaqatiginninniarnernut uagut peqataanngilagut. Qanoq isumaqatiginninniarnermi tunngavilersuisoqarsimanersoq ilisimanngilarput. Taamaammat akisinnaanngilara, Naaja Nathanielsen oqarpoq.
Pakatsineq paasisinnaagaa
Attaveqaqatigiinnissap pingaaruteqarnera taassuma naqissuserpaa.
- Folketingimi ilaasortat Naalakkersuisullu oqaluuttarnissaat qanoq pingaaruteqartiginersoq ersersiinnarpaa. Aki-Matilda Høegh-Damilu tulliani naapikkutta pisoq eqqartortariaqaripput isumaqarpunga. Kaffisoqatiginissaanut qaaqqusinnaakutsoorpara.
Peqatigiiffik pineqartoq aningaasaliiffigineqanngitsoornini assut ugguaraa. Taakkununnga ilaasortaanullu qanoq oqaasissaqarpit?
- Ugguarnerat paasisinnaakutsoorpara, pisormi tamaat isigalugu ilungersunarpoq. Qilanaarisarali aana: Aningaasanut inatsimmi 2022-mi ni millionit koruunit kalerrisaarummut atugassamut illikartitsisoqarnikuuvoq, Naaja Nathanielsen oqarpoq, nangipporlu:
- 2017-imi ajortumik pisoqarmalli Naalakkersuisut Naalakkersuisuusimasullu aaqqiissutissanik, ilisimasanik, pisimasup innuttaasunut kinguneri iluarsiiviginissaannut - Illorsuit, Nuugaatsiaq taakkualu eqqaaniittunut suliaqarput. Siunissami aaqqiissutissanik ujartuilluta ilungersornerput neriuppunga tuppallersaataalaarsinnaasoq.
Uummannap sulluani 2017-imi tassaarsuaqarmat Illorsuaq Nuugaatsiarlu eqqugaapput. Nuugaatsiami inuit sisamat ajunaarput.
