Kommuneqarfik Sermersuumi inissiisarneq pillugu akerleriissumik saqqummiisoqartoq

Kommuneqarfik Sermersuumi borgmesteri, Avaaraq Olsen, angajoqqaat inissaaleqinerat pissutigalugu meeqqanik angerlarsimaffiup avataanut inissiineq ajorlutik Inatsisartunut siusinnerusukkut ammasumik allagaqaatigaa.

Inatsisartuni meeqqat ilaqutariillu sanngiinnerusut pillugit oqallittoqarmat, Avaaraq Olsenip oqallinneq pissutsinut piviusunut naapertuutinnginnerarpaa.

- Kommuneqarfik Sermersuumiit kissaatigineqarpoq erseqqissarneqassasoq, meeqqat inissaaleqineq imaluunniit aningaasaqarnermut tunngasut pissutigalugit angerlarsimaffiup avataanut inissinneqarneq ajortut. Angerlarsimaffiup avataanut inissiineq pisarpoq, meeqqap atugarissaarnera isumannaatsuunissaalu pillugu suliat tunngavigalugit naliliisoqareeraangat, taama borgmesteri ilaatigut allappoq.

Tamannali Kommuneqarfik Sermersuumi meeqqanut, ilaqutariinnullu ingerlatsivimmi allatut oqaatigineqarpoq.

- Meeqqanut Ilaqutariinnullu Ingerlatsivik angajoqqaat inissaqannginnerat kisiat pissutigalugu meeqqanik piffissami matumani ulloq unnuarlu angerlarsimaffinni imaluunniit ilaqutariinni paarsisartuni inissisimasunik angerlartitsinissamut immikkut ittumik suliniummik aallartitsivoq.

- Suliniut aallartinneqarpoq meeqqat aaqqissuussaasumik angerlarsimaffeqanngitsuuneq pissutigalugu inisseqqaannannginnissaat qulakkeerniarlugu – aamma meeqqap ilaqutariittut inuuneqarnissamut pisinnaatitaaffeqarnera tapersersorniarlugu, meeqqanut ilaqutariinnullu ingerlatsivik allappoq.

Tassunga tunngatillugu Kommuneqarfik Sermersuumi borgmesteri, Avaaraq Olsen, KNR-imiit oqaaseqartikkusullugu attavigigaluarparput. Paaserusullutigu kommunimi sullissisut sooq akerleriittunik oqaaseqarnersut, taannali tamatumunnga oqaasissaqannginnerarpoq.

Ilaqutariit ikioqqusut

Naak Kommuneqarfik Sermersuumi borgmesteri, Avaaraq Olsen oqaraluartoq,  angajoqqaat inissaaleqinerat pissutigalugu meeqqanik angerlarsimaffiup avataanut inissiineq ajorlutik, taamaattoq KNR-iminngaanniit oqaloqatigisarput allatorluinnaq nalaataqarpoq. 

Kommuneqarfik Sermersuumi najugalik, Bibi Knudsen, uinilu sisamanik, 16-inik, aqqanilinnik, qulingiluanik arfineq marlunnillu ukiulinnik meeraqarput najugaqatigisaminnik.

Taakku Nuummi inissiaatileqatigiiffimmut Ini A/S-imut isumaqatigiissuteqarlutik inimik attartukkamik najugaqarput, pissuteqartumilli attartornerat unitsinneqartariaqalerpoq.

Ilaqutariit sumiiffissaarutileramik najugassaminnillu nassaarsinnaajunnaavikkamik, meerartaqarnertik pissutigalugu Kommuneqarfik Sermersuumut saaffiginnipput ikioqqullutik.

Ilaqutariit inuuniarnermikkut ajornartorsiuteqanngimmata Kommuneqarfik Sermersumiit ikiorneqarsinnaanatik ilisimatinneqarput.

- Siullerpaamik saaffiginnikkatta apeqqutigineqartoq tassaavoq imerajuttuuisi aamma ikiaroorajuttuuisi? Naamik, imerajuttuunnginnassi ikiaroorajuttuunnginnassi ikiorsinnaanngilassi, Bibi Knudsen KNR-imut oqarpoq.

Taanna uinilu suliffeqarput inigisaminnullu akiliisinnaassuseqarlutik. Meerartaqaramilli isumaginnittoqarfik aqqutigalugu inissianut inissinneqarsinnaanerlutik kommunimut saaffiginnipput.

- Kommunimut siullerpaamik saaffiginnikkama socialboligmik isumaginnittoqarfik aqqutigalugu ineqalersinnaanerluta ikiorneqarsinnaanerlunga saaffiginnissuteqarpunga, toqqaannartumik akineqarpunga; ikiorsinnaanngilassi. Socialboligimik isumaginnittoqarfik aqqutigalugu inissamik tunniussinissaq ajornaqimmat.

- Taama oqariarmata aperivakka, taavami meeqqakka piffissaq kingulleq sumunnarfissaqanngippata sumunnassaagut? Meeqqakka sumunnassappat? Taava Kommuneqarfik Sermersuup toqqaannartumik akivaanga, ikiorsinnaavassi meeqqat angerlarsimaffiup avataanut piffissaq kingulleq atorlugu inissinneqarsinnaapput, Bibi Knudsen oqarpoq.

Nuuttariaqalerneq

Ilaqutariit meeqqatik angerlarsimaffiup avataanut inissinneqarnissaat pinngitsoortinniarlugu Nuummiit nuunnissartik aalajangiuppaat.

Taakku kujataani Qaqortumi ineqarlutik maannakkut najugaqarput.

- Soorunami akueriinnarsinnaanngilara meeqqakka ulloq unnuarlu angerlarsimaffimmut tunniutiinnassallugit, taama oqarfigineqaratta  ilungersuummerujussuarpugut. Nalunngikkaluarpara Nuummi inissaaleqinartorujussuusoq. Taamaammat illoqarfigisatsinnut angerlaannarniarluta aalajangerpugut. Qaqortumi inissatsinnik ujartuilerpugut ingerlatiinnangajallutalu iluatsitsivugut, Bibi Knudsen oqarpoq.