Ullormut nalunaarut: Tasiusaq attaveeruttoq
Nunaqarfimmi Tasiusami Upernaviup eqqaaniittumi attaveqaatitigut tallimanngornermi ualikkut ajutoortoqarpoq.
- Nukissiorfiit assigiinngitsut Tusassilu attaveqarfigaagut, nunaqarfimmi kallerup innera qamittoq attaveqaatillu qamittut paasitinneqarpugut. Ajornartorsiut Tusassip akisussaaffigaa, kallerup inneqaannaavissimasulli paasinarsivoq, Kalaallit Nunaanni Politiit pigaartuisa pisortaat, Thomas Jeppesen oqarpoq.
Politiit nunaqarfik qaammataasiakkut attavinitsippaa, taamaalilluni innuttaasut oqartussanut attaveqarsinnaalerlutik.
Islandimi atortorissaarutit pisariallit ajoquteqarsimasut, Tusassip nittartakkamini tallimanngornermi ualikkut allappaa, taamaattumillu atuisut internetimut attaveqarnerat ajornakusoorsimasoq. Kallerup innerata ajutoornera Tasiusamut attuumassuteqarsimanngitsoq, Tusassip nalunaaqutaq 17.03 nalunaarutigaa.
Immap naqqatigut kabelimikattaveqarneq atorunnaarsillugu, Amerikap Avannaanut attaveqarneq nuutsinneqartariaqarsimavoq. Attaveqaatillu tamarmik aaqqeqqittut, Tusassip nalunaaqutaq 18.20 allappaa.
Immap naqqatigut kabelip ajoquteqarnera Nuummi aamma malugineqarpoq, inuit dankortinik akiliisinnaajunnaaraluarlutik.
Tasiusaq Sermitsiaq naapertorlugu suli attaveqanngilaq.
Imigassamut tunngassutilinnik suliat
Immap naqqatigut kabelip saniatigut imigassamik attuumassutilinnik nunarput tamakkerlugu ajornartorsiortoqartoq, pigaartut pisortaat allappoq.
- Imigassartorsimanermut attuumassuteqartorpassuit suliaraagut, angerlarsimaffimmi eqqissiviilliornerit persuttaanerlu, Thomas Jeppesen oqarpoq. Sulialli qanoq amerlatiginersut oqaatigisinnaanngikkallarpaa.
