Jens-Frederik Nielsenip inuiannik nungusaasoqarsimaneranik oqartoqarsinnaanera illersorpaa

Múte B. Egede (IA) Danmarki "inuiannik nungusaanerareeraa" eqqartuussisunut suliassanngortinneqaratarsinnaanermini tapersersorneqarpoq.

Naalakkersuisuni siulittaasuunikoq, Múte B. Egede naartunaveersaasersuinikuunerup oqaaseqarfigisinnaanera pisinnaatitaaffigigaa, Naalakkersuisut siulittaasuata Jens-Frederik Nielsenip (D) tusagassiuutinut nalunaarummini oqaatigaa.

- Tamat oqartussaatitaanerani ammasumik annernarsinnaasunik eqqartuisinnaasariaqarpugut.

- Múte B. Egedep pisinnaatitaaffigimmagu oqaaseqarsinnaanini – inuit ataasiakkaat soorlu qallunaat nunaanni ministeriusimasut misigissusaat aallaaviginagit”,  Jens-Frederik Nielsen oqarpoq.

Naalakkersuisut Ilisimatusartoqatigiit naartunaveersaasersuisimaneq inuiannik nungusaanermik taaneqarsinnaaneranik misissuinerat utaqqimaarlugu, taassuma erseqqissaatigaa. Misissuineq januaarip naanerani 2026-imi piareernissaa utaqqineqarpoq.

Danmarkimi nunarput pillugu ministeriunikup, Tom Høyemip Múte B. Egede eqqartuussivimmut suliassanngortinniarnerarnikuunera oqallisaanikuuvoq. Martsimilu qinersinerup kingorna aningaasaqarnermut naalakkersuisunngornikuuvoq.

Piffik taanna qaangiutereerpoq

Kalaallit niviarsiarartai arnartaalu illissakkut naartunaveersaaserlugit spiralilersorneqarnikuuneri Múte B. Egedep Danmarki inuiannik nungusaasimanerarlugu decembarimi oqaatigaa, taanna peqqutigalugu eqqartuussivimmut suliassanngortiniarneraaneq aallartinneqarpoq.

Tom Høyem Danmarkimi ukiut tallimat nunarput pillugu ministeriunikuuvoq, naalakkersuisoqarfillu taanna 1987-imi unitsinneqarpoq.

Tom Høyemip Múte B. Egede eqqartuutitinniarlugu Politikenimut oqaatigereeraa, Múte B. Egede facebookimi ikkussilluni qisuariarpoq.

- Spiralilersuisimaneq pillugu oqaatigisimasakka, siorasaarneqarnikkut utertinnaviarnagillu nipangiunnavianngilakka. Taamaaliuinnarsinnaasorineq qangarsuarli qaangiutereerpoq. Oqaatigisimasakka aamma inunnut ataasiakkaanut tunngasuugatik, danskit naalagaaffiannut tunngassuteqartuaannarnikuupput.

- Taamaammat qanorluunniit pisoqarnissaanut piareersimavunga , taanna marlunngornermi ikkussamini taama allappoq.

Múte B. Egedep unnerluussutini ersarissumik attatiinnarmagu, Tom Høyerip eqqartuussissuserisuata, Dan Shefetip "kanngunarnerarpaa".

Ministeriunerup, Mette Frederiksen (S) arnat naartunaveersaaserneqarnikut septembarimi nunatsinniilluni pisortatigoortumik utoqqatserfigai.

Nunatsinnittaaq naalakkersuisoqarfik akisussaaffimmik tigusivoq, Jens-Frederik Nielsenilu utoqqatserluni.

/ritzau/