Meeqqat Illersuisuat: Oqaatsivut takornartallu oqaasii pingaaruteqarput
Meeqqat illersuisuat oqalugiartunut ilaavoq, taassumalu oqaatsinik ataasiinnaanngitsunik ilinniartitsisoqartarnissaa oqariartuutigaa.
- Immitsinnut annaanngikkaluarluta kinaassuserput nukittutikkaluarlugu oqaatsivullu attakkaluarlugit aamma pisariaqarpoq allat oqaasiinik ilikkagaqarnissarput, meeqqat illersuisuat Aviaja Egede Lynge oqarpoq.
Nunatsinni oqaatsitta oqallisigineqartarneri initoorujussuupput, ilaatigut oqaatsivut eqqortumik atorneerukkiartornerisa kinguneranik tammariartulersinnaaneri ernummatigineqartarluni.
AAMMA ATUARUK ICC-konference om uddannelse begynder i dag
Oqaatsitik annaavaat
Alaskamilu naggueqatitta nunasiaataanerup kingunerisaanik oqaatsitik annaasimavaat. Najugaqarfinnilu ataasiakkaaginnaat inupiatut oqalussinnaasarput.
- Nunat inoqqaavisa oqaasiinut tunngatillugu Kalaallit Nunaannut sanilliutissagutta killormorluinnaq inissisimavugut. Najuqarfiimmi ilaanni ataasiinnaq marluinnaalluunniit inupiat oqaasiinik oqalussinnaasarput, ICC Alaskami ilinniartitaanermut ataatsimiititaliaani ilaasortaq Bernadette Alvanna-Stimpfle oqarpoq.
Angajoqqaat meeqqaminnut naveersigaangamik aatsaat nammineq oqaatsitsik atortaraat assersuutigaa.
Naggueqatigiillu inuit oqaasiisa ilikkarumaneqarnerinut tamanna iluaqutaanngitsoq Bernadette Alvanna-Stimpfle oqarpoq.
AAMMA ATUARUK Naggueqatigiit oqaasii ilinniagaqarnermut pitsanngorsaataassasut
Oqaatsit allat piumasaqaataapput
Nunatsinni kalaallisuinnaq oqaaseqartut ilinniaqqinnissaminnut aporfigisinnaasarpaat, oqaatsinimmi allanik piginnaasaqarnissaq piumasaqaataasarmat.
Taamaammat nammineq oqaatsit takornartallu oqaasii oqimaaqatigiissaarnissaat pisariaqartoq meqqat illersuisuat oqarpoq.
- Tamakkiinerusumik isiginnittariaaseqalerutta tamatta, soorlu oqaatsigut pigigaluarlugit oqaatsit allat pigisinnaallutigu kinaassuserpulli pigalugu, taava ajornartorsiut immaqa taama angitigissanngikkaluarpoq.
ICC-p issittumi ilinniartitaanermut unammilligassat pillugit ataatsimeersuartitsinera Alaskamit, Canadamit, Chukotkamit nunatsinniillu peqataaffigineqarpoq.
AAMMA ATUARUK ICC-mi 2018-imi ulapittoqassasoq