Inuit ilinniartitaanerat pillugu ataatsimeersuarneq
Issittumilu ilinniartitaanerup unammilligassaqarnera eqqartorneqassaaq.
ICC-p Nuummi ataatsimeersuarnissaanut atatillugu ataatsimiigiartorpassuit ulluni makkunani Nuummiipput, Issittumilu ilinniartitaaneq qulequtarineqassalluni.
ICC Kalaallit Nunaata siulittaasuata Hjalmar Dahlip peqataasussat 90-it missaanniittut Katuamut ullaaq manna marlunngornermi tikilluaqqussavai.
Pisortatigoortumik atuartitaanermi ilinniartitaanermilu immikkoortumik Inuit ilinniartitaanermi perorsaanermilu, oqaatsit atornerini, taamatullu ilisimasanik ingerlatitseqqinnerni iliuuserineqartut atornerini iluatsitsinerit amigaatigineqartullu tikkuartornissaat, kiisalu Issittumi nunani najugaqarfinni toqqammaveqarnersut paasisaqarfiginissaat, ataatsimeersuarnermut siunertaavoq.
Issittumi inissisimanermut atatillugu Inuit akornanni ilinniartitaanerup inissisimaneranik nalunaarusiortoqassaaq. Issittumi nunat immikkoortuini Inuit najugaqarfigisaanni ilisimasanik paarlaateqatigiinnikkut naggueqatigiit Inuit akornanni perorsaaneq oqaatsillu nukittorsarneqarnissaat ataatsimeersuarnermi taassuma saniatigut anguniagaavoq.
Alaskami, Canadami Tjukotkamilu Inuit ilinniartitaanermi unammilligassaat pillugu ataatsimeersuarnerup ulluisa siullianni tusarnaartoqarsinnaassaaq.
"Inuit Education Summit"-imik taallugu ICC-p Nuummi ullumimiit ataatsimeersuarnissaa sisamanngorpat 15-iata tungaanut pisussatut pilersaarutigineqarpoq.
Ataatsimeersuarnermi saqqummiunneqartut kalaallisut nutserneqarnerat tusarnaarneqarsinnaassaaq, saqqummiussisulluunniit oqaasii tusarnaarneqarsinnaassallutik.
Oqaatsit assigiinngitsut TV-kkut isiginnaarutitigut nammineq toqqarneqarsinnaassapput.
Ataatsimeersuarneq aamma toqqaannartumik uani malinneqarsinnaavoq:
AAMMA ATUARUK ICC-mi 2018-imi ulapittoqassasoq