Naggueqatigiit oqaasii ilinniagaqarnermut pitsanngorsaataassasut
Inuit issittormiut Siunnersuisoqatigiivisa ICC-p ataatsimeersuartitsinerani oqaatigineqartaarpoq.
Canadami Alaskamilu ilinniartitsinerup tungaatigut qanoq iliorluni pitsanngorsaasoqarsimanera marlunngormat ullaap tungaani ataatsimeersuarnermi oqaluttuarineqarput.
Ataatsimeersuaqataasut ilaata Inuit Tapiriit præsidentiata Kalaallit Nunaanni iliuuserineqarsimasut ilinniarfigineqarsinnaanerarpaa.
- Canadami oqaatsivut illersornissaannut iliuuseqarnerusariaqarpugut, atuarfinnilu atugaanerusariaqarlutik. Kalaallit Nunaannimi ilinniartitsisarnerisut ilinniartitsisoqarneq ajorpoq, Inuit Tapiriit Kanatami præsidentiat, Natan Obed oqarpoq.
AAMMA ATUARUK Inuit oqaasii Canadami pitsaanerujartuinnartumik inissisimasut
Tuluttut ilinniartinneqarnerusarput
Inuktitut 3. klassip tungaannaanut maanna ilinniartitsisoqartarpoq, atuartitaanerullu sinnera tuluttuinnaq ingerlanneqartarluni.
Nunap inoqqaavisa oqaasii ilinniartitsissutigilluarneqartannginnerat Canadami sumiiffiit ilaanni kingunipiloqareersoq Natan Obed isumaqarpoq.
Inuiaqatigiit ilaasa oqaatsitik naluaat. Ilinniartitaanerli aqqutigalugu tamanna allanngortinneqarsinnaasoq neriuutigaarput, ingammik Inuktitut klassini tamani ilinniartitsissutigineqalernerisigut.
Inuktitut ilinniartitsinerup saniatigut angajoqqaat meeqqami atuartitaanerannut peqataatinneqarnerat pitsanngorsaaffigineqarusuppoq.
AAMMA ATUARUK ICC-konference om uddannelse begynder i dag
Oqaatsit naggueqatigiit Inuit nukittorsassavaat
Alaskami suliniutit arfinillit inuusuttut ilinniartinneqarnerannut iluaqutissatut ukiut pingasut matuma siorna saqqummiunneqarput.
Inuusuttut naggueqatigiit Inunneersuunertik tanngassimaarutigissagaat anguniakkani pingaarnerpaasoq ICC Alaskami suliniummi pisortap oqaatigaa.
- Inuit oqaatsiminnut pingaartitaminnullu aqqutissiuunneqassapput. Taamaammat ilinniartitaanermut ilanngunneqassallutik, ICC Alaskameersoq Pauline Harvey oqarpoq.