Vivian Motzfeldt: Oqaatsitsinnik pingaartitsinerput qaffakkaluttuinnarpoq

Tuluit oqaasiisa nunatsinni oqaatsit aappaattut inissisimalissagaluarpata ernumanartutut, nalunaarusiami saqqummiunneqartut, Vivian Motzfeldtip isumaqatiginngilai.

Immikkut ilisimasallit meeqqat atuarfianni ilinniartitsisunngorniarlunilu ilinniarnermi kalaallit, qallunaat tuluillu oqaasiinik, siulliutitsisinnaaneq misissorsimavaat. 

Nunatsinni oqaatsit taakkua tamarmik atorfissaqartinneqartut misissuinermi tunngaviusoq, immikkut ilisimasallit misissuisuusut siulittaasuat, Københavnip universitetiani professori, Anna Holmen, oqaluttuarpoq:

- Inuusuit inuussutissarsiuteqarnissaat, nunatta aningaasarsiornissaa nunarsuarmioqataanerlu eqqarsaatigalugit tuluit oqaasiisa atorneqarneri nukittorsassallugit tulluarpoq, Anna Holmen oqarpoq.

Oqaatsigut tammatsaalioruminaassisinnaasorai

Aammali tuluit oqaasii salliutinneqalissappata tamanna unammillernartoqassasoq, taanna oqarpoq.

Oqaatsinimmi ilisimatusarnermi paaseqatigiissutaavoq, tuluit oqaasii oqaatsinik allanik nungusaataasuusut, Anna Holmen oqaluttuarpoq.

- Niuffannermi nukiit pissutigalugu tuluit oqaasii oqaatsit allat ingiarlugit sallinngortaramik sumi  tamani atorneqarnerulersarput. Taamaammat kalaallit oqaasii tammatsaalioruminaassisinnaapput.

AAMMA ATUARUK Tuluit oqaasii nunatsinni takornartat oqaasiini salliutinneqassapput

Ernumassutissaqanngitsugulli, ilinniartitaanermut naalakkersuisoq isumaqarpoq:

- Isumaqarpunga oqaatsitsinnik ullumikkut ukkassineq, naleqartitsineq pingaartitsinerlu qaffakkaluttuinnartillugit ernumassutit taakku piffissami allami taama inerneqaratarsinnaaneranik ernumassutaasarsimasut pissutissaqanngitsoq ernumassutissaqarfigissallugit, naalakkersuisoq Vivian Motzfeldt oqarpoq.

Qallunaat oqaasii pingaartuujunnaarsikkiartuaarnerat aamma unammillernartoqartoq, immikkut ilisimasallit isumaqarput.

AAMMA ATUARUK Tuluit oqaasii sallinngortinneqassappata naleqqussaasoqaqqaartariaqartoq

- Danmarkimi ilinniagaqaqqinnissamut periarfissat mattunneqarsinnaanerat immikkut ilisimasallit nalunaarusiortuisa ernummatigaat, Anna Holmen oqarpoq.

Kisianni tuluit oqaasiinik pingaartitsinerput isumaqanngilaq oqaatsit allat pingaannginnerusutut inissinneqartut. Oqaatsimmi nunarsuarmioqataanermi nukittorsaasut ammaffigisariaqarigut, Vivian Motzfeldt oqarpoq:

- Isumaqarpunga oqaaserpassuarnik piginnaaneqalernissamut tamatta tamatigut ammaffeqartuassasugut, imaanngitsoq arlaat pingaartinneqarmat sinneri tamarmik mattunneqartut.

Massakkuunngikkallartoq

Oqaatsit suulluunniit atorneqaraluarpata oqaatsinik ilinniartitsisut pikkorissut pingaarnerpaasut, Anna Holmen isumaqarpoq.

Tuluit oqaasiisa allamiut oqaasiisut pingaarnertut atugaalernissaat pimoorullugu sulissutigigaanni, qaqugu tamanna pivisunngorsinnaanersoq immikkut ilisimasallit nalunaarusiortut piffissaliisinnaapput.

- Taava eqqoriassagutsigu naatsorsuutigisinnaavarput tamanna ukiut 15-it 20-lluunniit qaangiuppata pissasoq, professori Anna Holmen oqarpoq.

AAMMA ATUARUK Oqaatsivut takornartallu oqaasii pingaaruteqarput

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl