Tuluit oqaasii sallinngortinneqassappata naleqqussaasoqaqqaartariaqartoq
Ilinniartitaanermut naalakkersuisuujunnaartup Doris Jakobsen Jensenip immikkut ilisimasalinnik suleqatigiissitamik nalunaarusiortussamik 2017-imi marsimi pilersitsivoq.
AAMMA ATUARUK Ilinniartitsisunngortussat kalaallisut oqalussinaanerat angusaannit pingaarneruvoq
Tuluit oqaasii takornartat oqaasiisut sallinngortinneqassappata atuartitsissutit ullutsinnut naleqqussarneqaqqaartariaqarput tuluttullu ilinniartitsisut amerlanerusariaqarlutik. Suleqatigiissitat immikkut ilisimasallit nalunaarusiaminni taama inerniliipput.
Naalakkersuisup nalunaarusiaq nuannaarutigaa
Tamanna piviusunngortinneqarsinnaavoq, massakkuunngikkallartorli.
- Inerniliineq taanna tupaallaatiginngilara, oqaatsinik ilinniartitsinerni tamani pissusissamisoortumik aallaaviusarmat ilinniartitsisussanik ilinniarsimasunik - faglærerinik - sulisussaqarnissaq, minnerunngitsumillu ilinniartitsinermi atorneqartussanik atuakkanik peqarnissaq.
Ilinniartitaanermut naalakkersuisoq Vivian Motzfeldt tusagassiuutinut nalunaarummi taama allappoq, nangillunilu:
- Taamaattumillu Naalakkersuisut aamma Naalakkersuisooqatigiinnermut isumaqatigiissummi siullertut anguniagaraat sulissutigineqassasoq angujartuaagassatut tuluit oqaasiisa allamiut oqaasiisut siullertut inissikkiartuaarnissaat. Nalunngilarput tamanna piffissap sivikitsuinnaap iluani pisinnaanngitsoq, naalakkersuisoq allappoq.
Nalingiisillugit nukittorsarneqartariaqartut
Oqaatsilli atukkavut pingasut taakku nalingiisillugit nukittorsarneqassapput taava aamma atuartut oqaatsitigut misilittagaat, alapernaannerat atuerusunnerallu ukkatarineqarnerusariaqartut, nalunaarusiami allassimavoq.
Oqaatsinimmi atuartitsinermi allattariarsorneq grammatikkilu maanna sammineqaqisut, suleqatigiissitat naliliipput.
Kalaallisut oqaatsitsigut kinaassuseq nukittorsarneqartariaqartoq, taakku aamma inerniliipput.
Meeqqat ilitsoqqussaralugu oqaatsiminnik nuannarinninnerat perruuaalaaruteqarnerallu peqataatitsinikkut oqaatsinillu pinngorartitsisinnaanikkut nukittorsarneqassapput.
AAMMA ATUARUK Pisortat suliffeqarfiutaanni kalaallisuinnaq oqaluttoqassaaq
Atuartunut minnernut oqariartaatsinik pinnguarneq, eqqortumik grammatikkimillu tunngaveqartumik oqalunnermit pingaarnerusoq, nalunaarusiami allapput.
Danskit oqaasii inassuteqaatini arfinilinni aamma ilaapput.
Danskit oqaasiinik piginnaasaqarneq ilinniagaqarnermut suliffeqarnermullu suli pingaaruteqarpoq, kisianni takornartat oqaasiisut isigineqassapput, taamaammallu oqaatsinik ilinniartitsineq tamatumunnga naleqqussarneqassasoq, nalunaarusiami allapput.
AAMMA ATUARUK Oqaatsit inatsisilerinermi atorneqartartut kalaallisut taaguuteqanngitsut