Inatsisilerinermik ilinniarfik Oqaatsit inatsisilerinermi atorneqartartut kalaallisut taaguuteqanngitsut

Taamaakkaluartorli inatsisilerinermi oqaatsit atorneqartartut kalaallisut taaguuteqannginneri unammillernangaatsiarpoq. Taamaammat inatsisilerinermik taamaallaat ilinniartitsisoqarnavianngilaq. Oqaatsit aamma ineriartortinneqassapput.

Kalaallit inatsisilerinermi ilinniarfittaavata danskillu ilinniarfiisa tassunga assingusut assigiinngissutiginerpaasaat tassaavoq ilinniartitsinerup ilarujussua kalaallisut ingerlanneqartussaammat.

- Kalaallit oqaasii ilinniakkami matumani atorneqangaatsiarnissaat sammineqangaatsiarsimavoq, suleqatigiissitani ilaasortat ilaat ilinniarfimmilu lektori avataaneersoq, Morten Nornild oqarpoq.

Ilinniartut ilaatigut ’Inatsisilerinermi Kalaallisut’-mik ilinniartinneqassapput, suliakkiussallu qassiit kalaallisut tunniunneqarnissaat aamma piumasaqaataavoq.

AAMMA ATUARUK Inatsisilerinermik ilinniarfik nunatsinnut iluaqutaassasoq

Eqqartuussissuserisup Ulrik Blidorfip inatsisilerinermik ilinniarfimmik aallartittoqarnera nuannaarutigaa.

Taassumali Qanoruukkut pingasunngornermi apersorneqarnermini inatsisilerinermi taaguutit kalaallisut amigaataanerarpai tamannalu unammillernartuunerarlugu.

- Annertuumik ajornartorsiutaavoq. Ingammik pisortat avataanni. Niuernerup silarsuaani, aalisarnerup silarsuaani assigiinngitsunilu. Isumaqatigiissummik qallunaatut tuluttulluunniit allaqqasut kalaallisut paasitinneqarnissaa ajornartorsiutaaqaaq, Ulrik Blidorf oqarpoq.

Tamatumalu unammillernartuunera Inuiaqatigiilerinermut, Aningaasaqarnermut, Tusagassiutilerinermullu immikkoortortaqarfimmi pisortap, Gestur Hovgaardip isumaqatigaa.

AAMMA ATUARUK Ilisimatusarfimmi inatsisilerituutut ilinniartoqarsinnaalersoq

- Ilungersunarpoq, unammillernangaatsiartoq nalunngilluarparput. Kisianni unammilligassaavoq, ’Saperpugumimmi’ oqaannarluta nikinnavianngilagut. Taamaammat unammillissutigisariaqarparput, Gestur Hovgaard oqarpoq.

Taamaammat ilinniartitsisussat tamatumanik suliaqarnissaat pilersaarutaasoq, Gestur Hovgaardip oqaatigaa.

- Ilinniakkamik ilinniartitsisut inatsisilerinermi taaguutit kalaallisut ineriartortitseqataaffigissagaat takorloorneqarpoq.

Ilinniakkap aaqqissuunneqarnerata nassuiaataani atuartitsissutissat amerlanerit aallaqqaammut danskisut ingerlanneqarnissaat naatsorsuutigineqartoq allassimavoq.

Inatsisilerinermi ilinniarfimmut nutaamut kingusinnerpaamik marsip aallaqqaataat qinnuteqartoqarsinnaavoq.