Inatsisilerinermik ilinniarfik nunatsinnut iluaqutaassasoq
Inatsisit oqaasertaat pillugit Nunatsinni siullersaallutik ilinnialersussat septembarimi aallartissapput. Inatsisilerinermut bachelorinngornissamut pisortat inatsisaat ingerlatsinerlu immikkut ukkatarineqassapput, tamannalu inuiaqatigiinnut assorsuaq iluaqutaassasoq Morten Nornild oqarpoq. Taanna ilinniakkamut nutaamut suleqatigiissitamiippoq, Ilisimatusarfimmullu atasumik lektoriulluni.
- Namminersorlutik Oqartussani kommuninilu sullissisut sulinerminni pitsanngorsaavigineqassasut, taanna oqarpoq.
AAMMA ATUARUK Ilisimatusarfimmi inatsisilerituutut ilinniartoqarsinnaalersoq
Aammalu inatsisilerituunik avataaneersunik tikisitsinissaraluanut aningaasartuutissat annikillisarneqassallutik, Morten Nornild oqarpoq.
Taakku saniatigut kalaallit inatsisilerituunngortussat maani inuiaqatigiinnut toraagaqarlutik ilinniassasut, Inuiaqatigiilerinermik, aningaasarsiornermik tusagassiornermillu ilisimatusarfimmi pisortaq Gestur Hovgaard oqarpoq.
- Ilinniagaq una kalaallinik inuiaqatigiinnik kalaallillu inatsiseqarnikkut atugaannik aallaaveqartoq, taanna ilanngullugu oqarpoq.
AAMMA ATUARUK Allannguutit inatsisinut ilanngunneqartannginnerat ajornartorsiutaavoq
Danskit inatsisilerituunik ilinniartitsisarnerannut assigiinngissutigaa Ilisimatusarfimmi ilinniartitsineq kalaallisut ingerlanneqassammat, kalaallit inatsisaat ilinniarneqassapput, danskillu aalajangingaat assersuutiginagit, kalaallit aalajangingaat assersuutigineqartassasut, Morten Nornild oqarpoq.
Taama ilinniartitsinerup kingunerissavaa ilinniartut naammassigunik assorsuaq inuiaqatigiinni atorluarneqarnissaat, lektori oqarpoq.
AAMMA ATUARUK Kalaallit Nunaat siullerpaamik illersuisuunertaarpoq
Pisortat inatsisaat pillugit immikkut ilisimasalinngortussanik ilinniartitsisoqassaaq, naammassisut kalaallisut oqaaseqartuunermik saniatigut Kalaallit Nunaanni inatsisilerinerup iluani inatsiseqarnikkut annertuumik paasisimasaqartuussasut, Morten Nornild oqarpoq.
Inatsisilerituutut ilinniarnissamut qinnuteqarfissaq marsip aallaqqaataanut killeqarpoq.
AAMMA ATUARUK IA håber landsforsvarer kan styrke retssikkerheden
