Allannguutit inatsisinut ilanngunneqartannginnerat ajornartorsiutaavoq
Inatsisartuni inatsisinik allannguisoqassatillugu allannguut inatsimmut pioreersumut ilanngullugu aallanneqarneq ajorpoq.
Taamaattumik inuit namminneq qiortaallutillu nipitissuillutik allannguutit ilannguttariaqartarpaat, tamatumalu kinguneranik paatsiveeruttoqartarpoq.
- Allaat uatsinnut inatsisilerituunut ajornakusoortarpoq, paragraffimmi ilaat arlaleriarlutik allanngortinneqartarput, Anders Meilvang oqaluttuarpoq, taanna eqqartuussissuserisuuvoq aammalu siunnersuisarfimmik IKIU-mik aallartitseqataasuulluni, piumassutsimillu suleqataalluni.
Eqqartuusissuserisut siunnersuisoqatigiivisa Inatsisartut inatsisaasa nalunaarutinngorneqartannginnerinik isornartorsiuinerat taassuma taperserpaa.
Nalunaarutit tassaapput inatsimmik pioreersumik allannguutaallunillu pisortatigoortumik allaqqiinerit.
Ingerlatsivinnut soorlu isumaginninnikkut aningaasanik tunniussisartunut, aalisagartassiisartunut, innuttaasunut eqqartuussissuserisunullu Anders Meilvangitut ittunut pingaartuuvoq malittarisassat qanoq ittuuneri paasilluassallugit.
Inatsisartulli nutaanik inatsisilioraangata nalunaarutiliortoqarneq ajorpoq.
AAMMA ATUARUK Danmark akisussaasuuvoq
Assersuutigalugu oqartussaaffinnut Nunatsinnut nuunneqarsimasunut ajornartorsiutaasarput, Inatsisartut isumaginninnermut aalisarnermullu tunngasuni amerlasuunik allannguisarmata.
- Taamaattumik nuannertanngilaq inatsit nassaaralugu atoraanni, kingornalu paasillugu allannguut takunngitsoorsimallugu, Anders Meilvang oqarpoq, assersuutitullu nassuiarlugu, aalisarnermut inatsit 13-eriarlugu allanngortinneqarsimasoq, allannguutinullu tamakkiisumik isiginnilersitsisussamik nalunaarutiliortoqarsimanani.
"Kalaallit Nunaanni inatsisitigut isumannaatsuuneq" Eqqartuussissuserisut Siunnersuisoqatigiivisa nalunaarusiarigamikku inerniliuppaat nalunaarutit amigaataaneri innuttaasut inatsisitigut isumannaatsuunerannut unammillernartuusoq.
Anders Meilvang tamatumunnga isumaqataavoq.
- Suna pineqarnersoq nammineq paasisinnaanngikkaanni - malittarisassat paatsiveerullugit alaannaraanni, imaluunniit pisortat tamakkiisumik isiginnisinnaalluarsinnaannginnamik, iluamik aalajangernissaq ajornakusoortilerpassuk, Anders Meilvang oqarpoq.
Naalakkersuisut siulittaasuat ukioq manna siusinnerusukkut paragraf 37-ikkut akissummini allappoq sulisussaaleqineq pissutigalugu inatsisitigut inatsisinut nalunaarutiliortoqarneq ajortoq.
AAMMA ATUARUK Eqqartuussisoqarfiit kattunneqartariaqarput
