Arkivbillede Assi: KNR

Siumut: Ilinniartitsisunngortussat kalaallisut oqalussinaanerat angusaannit pingaarneruvoq

Meeqqat atuarfiini ilinniartitsisunngorumaaartut kalaallisut oqalussinnaanissaat ilinniarnertuunngorniarfinni angusarissaarnissaanniit pingaarneruvoq. Siumumit qineqqusaartoq, Suinni Johansen taama oqarpoq.

Doris J. Jensenip nunatsinni ilinniarfissuarmi ilinniartunngorniarnissamut piumasaqaatit apparnissaat siunnersuutigaa. Tamanna IMAK-ip Sulisitsisullu eqqarsarnartoqartippaat, Siumulli taakku ajornartorsiummik paasinnissinnaannginneraannarpai.

Siumut partiillu qineqqusaartitaa, Suinni Johansen naapertorlugu atuarfinni angusarissaarsimanermit kalaallisut oqalussinnaaneq pingaarneruvoq.

AAMMA ATUARUK Grønlandsk er vigtigere end karakterer for kommende lærere

Taama partiip namminerlu tunngavilersuuteqarnerminni Doris J. Jensenip ilinniarfissuarmut isernissamut piumasaqaatit apparnissaannik siunnersuutaa taperserpaa. Ilaatigut taamaaliornikkut nunatsinni ilinniartitsisunik amerlanerusunik siunissami ilinniarsimasoqalernissaa qulakkeerneqasaaq.

- Qinigassat marluupput, tassa ilinniarfissuarmut qinnuteqartunut piumasaqaatit apparnissaat imaluunniit ilinniartitsisunik kalaallisut oqaaseqanngitsunik atuartut oqaatsinik allanik atuartinnissaat, Suinni Johansen tusagassiuutinut nalunaarummi allappoq.

Qinigassarlu Suinnimut Siumumullu ersarippoq:

- Nunarsuarmi ilinniartitsisut pitsaanerpaat meeqqanik oqaloqateqarsinnaanngippata qanoq atorsinnaavagut? Suinni allappoq.

Taassuma angusarisimasat isiginiarunnaarnissaa pingaartuusoraa. Ilinniarfissuarmullu isernissamut piumasaqaatit appartariaqarnerarpai ilinniartullu ilinniarneranni ikiornissaat sammineqartariaqarnerarlugu. Suinni Johansenip ilinniarfissuarmi ilinniarneq oqilisarniarlugu ilinniarneq sivitsorneqassasoq siunnersuutigaa.