Siumut: Pisortat suliffeqarfiutaanni kalaallisuinnaq oqaluttoqassaaq
Nunatsinni pisortat suliffeqarfiutaanni 2025-imit kalaallisuinnaq oqaluttoqassaaq. Siumup 2017-2020-mut anguniagaani tamanna atuarneqarsinnaavoq.
- Suliffeqarfiit pisortat ingerlataat tamarmik oqaatsit pisortatigoortut - oqaatsivut - atorlugit ingerlatsiviussapput.
Pisortalli suliffeqarfiini sulisut oqaatsitsinnik atuinngitsut ilinniarsinnaanissaannut partiip periarfissikkusuppai, 'tamanna piumasaqaataammat'.
Siumup anguniakkamini aamma siunnersuutigaa ingerlatseqatigiiffinni pisortat pigisaanni aqutsisut inuiaqatigiit pillugit ilisimasaqarnissaat kalaallisullu oqalussinnaanissaat piumasaqaataassasoq:
- Suliffeqarfinni pisortat pigisaanni aqutsisunik atorfinitsitsinermi inuiaqatigiit pillugit ilisimasaqarnissaat piumasaqaatigineqassaaq, tamatumunngalu peqatigitillugu piumasaqaatigineqassalluni naleqartitatta ilisimasaqarfiginissaat, oqaatsitsinnik atuisinnaanissaq ilisimasaqarfigalugillu, inuillu tamakkuninnga naammassinnittut atorfinnut toqqaanermi salliutinneqartassapput.
AAMMA ATUARUK Ilinniartitsisunngortussat kalaallisut oqalussinaanerat angusaannit pingaarneruvoq
Siumumeersup Vivian Motzfeldtip kalaallisut oqaatsitta nunatsinni siuarsaavigineqarnissaannut suliniuteqartoqarnissaanut piffissanngorsoraa.
- Innuttaasut 92 procentii kalaallisut oqaaseqartuutillugit kalaallisullu paasisinnaatillugit (....) taava kalaallisut oqaatsitta atorneqarnissaat pissusissamisuussaaq, maannakkorpiarmi killormut inissisimasoqarmat, Vivian Motzfeldt taama oqarpoq.
Kalaallisuinnaq oqaluttoqalerpat pisortat suliffeqarfiutaanni atorfiit inuttalernissaat ajornakusoornerulissanersoq ernumassutiginngilaa.
- Siornatigut oqaatigisara uteqqissavara, nunatsinni ilinniarsimasut pisariaqartitavut piginnaasaqarluartut pigivagut, sooq taakku atussanngilagut, Vivian Motzfeldt taama oqarpoq.
Saammaateqatigiinnissamut isumalioqatigiissitap nalunaarusiaa naapertorlugu innuttaasut 85 procentii kalaallisut oqalussinnaallutik akisimapput.
AAMMA ATUARUK Nunaqavissuinnaat siulersuisuniissapput
AAMMA ATUARUK Nunatsinni suliffeqarfiit kandidatitut ilinniarsimasunut Danmarkimi pilerisaarilersut
