Enoksen: Nunaqavissuinnaat siulersuisuniissapput
Partiip piumasani pissappagu suliffeqarfinni soorlu Royal Greenlandimi Tele-Postimilu nunaqavissuinnarnik siulersuisoqalernissaa, Inatsisartunut qinersereernerup kingorna piaarnerpaamik pissaaq.
- Suliffeqarfinni inuiaqatigiit pigisaanni siulersuisut aaqqissuussaanerat piaartumik allanngortikkusullugu Partii Naleqqap kissaatigaa, Hans Enoksen oqarpoq.
Taanna aamma oqarpoq inuiaqatigiit piginnaasaat ima qaffasitsigilersimasut suliffeqarfiit nunaqavissuinnarnik siulersuisoqalersinnaallutik.
- Inuiaqatigut massakkut ilinniarsimassutsikkut misilittagaqassutsikkullu qaffangaatsiarnikuusut, tamakkiisumik piginnittuusutut siulersuisuunissaat avaqqunneqarsinnaanngilaq. Inatsisartunut iserutta tamanna piaarnerpaamik aaqqinniarparput, Hans Enoksen oqarpoq.
Kikkut siulersuisuniissanersut Sermitsiaq.AG-mit aperineqarami ima erseqqissaavoq:
- Kalaaleq. Nunaqavissunik aamma qallunaartaqarpugut, ukiorpassuarni nunatsinni najugaqarsimasunik, Hans Enoksen akivoq.
Hans Enoksenip siunnersuutaa piviusunngussappat ilaatigut suliffeqarfimmi, soorlu Tele-Postimi siulersuisuni siulittaasoq Stine Bosse aamma Royal Greenlandimi siulersuisuni siulittaasoq Niels Harald de Coninck-Smith taarserneqassapput.
