Nunatsinni Nakorsaanissaq Naalakkersuisut nassaarigaat
Henrik L. Hansen danskit nakorsaaneqarfianni tunuliaquteqarpoq, Savalimmiuni Nakorsaanertut aammalu Danmarkimi, Savalimmiuni nunanilu assigiinngitsuni nakorsatut nakorsatut sulisimalluni.
Peqqissutsimut naalakkersuisup, Agathe Fontainip, Henrik L. Hansen tikilluaqqussallugu qilanaaraa.
- Taama misilittagaqartigisumik qaffasissumillu ilinniarsimasumik inuttaliinerput assupilussuaq naammagisimaarpara. Uanga nammineq Naalakkersuisullu sinnerisa suleqatigiinnissatsinnut qilanaarpugut, peqqissutsimut naalakkersuisoq, Agathe Fontain, tusagassiuutinut taama oqarpoq.
Henrik L. Hansen Region Syddanmark-imi nakorsaanerit qullersaattut Savalimmiunilu Nakorsaanerugallartutut atorfeqareerluni sulilissaaq. Inuiaqatigiinni nakorsaaserinermi immikkut ilinniarsimavoq aammattaaq nappaatit siaruartaasiannik misissuinermik aammalu kisitsisit atorlugit nassuiaasiornermik Ph.D-tut ilisimatuunngorsimalluni.
Nakkutilliinermik siammasissumik misilittagaqarpoq aammalu suliffeqarfinni politikkikkut aqunneqarlutik aaqqissuussaasuni peqqinnissakkut ilinniakkat iluanni siunnersuinermik misilittagaqarluni.
- Atorfik qinnuteqarfigisimavara peqqinnissaqarfiup iluani ineriartortitsinerup ingerlatiinnarnissaa peqataaffigerusukkakku. Suleqatitaassama naapinnissaat qilanaaraara aammalu suliassarpassuit pissanganartut unamminartullu aallartinnissaannut qilanaarpunga, Henrik L. Hansen oqarpoq.
Nunatsinni Nakorsaanerup pingaarnertut suliassaa tassaavoq Naalakkersuisut nakorsaaneqarfiup iluani nunatsinni nunanilu allani suleqatigisartakkat suleqatigalugit suliniutinik ineriartortitsinermi patajaatsumik aalajangiinissamut tunngavississallugit.
Nunatsinni Nakorsaaneq arlalippassuarnik suliassaqarpoq ilaatigut innuttaasut peqqissussaat tamatumalu ineriartornera malinnaaffigissavai, pisortaqarfiit allat peqqissutsimut tunngasutigut siunnersussallugit aammalu kommunit peqqinnissaqarfiullu angerlarsimaffiutaannik nakkutilliineq kiisalu peqqinnissamik suliaqartut nakkutigissallugit.
Nunatsinni Nakorsaaneqarfiup peqqinnissamik suliaqartunut ilitsersuusiorneq aamma suliassaraa, peqqinnissamillu suliaqarnermut napparsimasut naammagittaalliuutaat suliarisarlugit kiisalu peqqissaasunut kalaallisut sulinissamut akuersissummik tunniussisartuuvoq.
