Aaja Chemnitz: Nunarput isumaqatiginninniarnernut pikkorippallaanngitsoq
Isumaqatiginninniarnerpassuit isumaqatigiissutillu milliardilikkuutaat 2025-mi naammassineqarput.
Isumaqatiginninniarnerilli eqqarsaatigalugit nunarput pikkorinnerulersinnaavoq. Folketingimi ilaasortaq Aaja Chemnitz taamak isumaqarpoq.
- Danmarkimut EU-mullu tunngatillugu (Massakkoqqissaaq, aaqq.) qanorluunniit iliuuseqartoqarsinnaavoq. Isumaqatiginninniarnissamut pikkorissuseq kisimi apeqqutaaginnarpoq; tamannalu pikkoriffigivallaanngilarput, taanna oqarpoq.
Taamaattumik isumaqatiginninniarnerni pingaaruteqartuni nunarput sinnerlugu oqaasissaqartitaasumik, nunatsinniit isumaqatiginninniartartut siuttussaanik toqqaasoqarnissaa Aaja Chemnitz siunnersuivoq.
- Nunatsinniit pingaarnertut isumaqatiginninniartartussamik peqartariaqaraluartoq isumaliutigisinnaavara. Inuk nunarput sinnerlugu isumaqatiginninniarnermut pikkorissorujussuaq, Danmarkimullu kisianni aamma EU-mut nunanullu allanut soqutigisatsinnik nakkutiginnissinnaasoq.
Isumaqatiginninniartartup atuuffia
Naalakkersuisoqarfiit attuumassutillit aamma Naalakkersuisuni politikerit, nunanik allanik aamma nunat peqatigiit peqatigalugit isumaqatiginninniutinik ullumikkut isumaqatigiissusiortarput.
Naalli politikeriugaluarluni naalakkersuisoqarfiugaluarluniluunnit ilisimasaqarluartut, illuatungerisanut sanngisuunut isumaqatigiissummik isumaqatiginninniarnermi sapernavianngikkaat isumaqanngilaq, Aaja Chemnitz isumaqarpoq.
- Isumaqatiginninniartartussap nunatta inissisimaffianut ullumikkornit iluaqutaangaatsiassasoq isumaqarpunga, tassani naalakkersuisoqarfiit ataasiakkaat imaannaanngitsuniit soorlu illersornissamut inuussutissarsiornermilu ineriartortitsinermik aamma immikkoortoqarfinnik allanik suliaqartut allanngorartunik misilittagaliusut isumaqatiginninniartarmata, taanna oqarpoq.
Isumaqatiginninniarnermi siuttoqalernissaa pillugu: qanoq aaqqissuunneqarsinnaava tassa, isumaqatiginninniartartussaq Danmarkimut EU-mut allanullu, nunatta ataatsimut nipaatut oqaaseqarnissaminut naammaginartumik piginnaatitaappat?
- Tassa piginnaatitaatitaq erseqqissaavigineqarluassaaq ullumikkornillu peqataatinneqarnerungaatsiassalluni. Peqataatitsineq pillugu isornartorsiuinerit peqataatitsinngippallaarneq pissutaalluni malitseqartitsisarput, Aaja Chemnitz oqarpoq.
- Peqataatitsisoqarnerutillugu pisariaqartitamini erseqqinnerusumik aamma Naalakkersuisunut Partiinullu illuatungiliuttunut tusarnaarluarsinnaanerusoqartarpoq, isumaqatiginninniartartussarlu sanngisuunerutillugu siornatigornit imaannaannginnerusunik isumaqatiginninniartitsisoqarsinnaavoq.
Vivian Motzfeldt qisuariartoq
Nunatta isumaqatiginninniarnernut pikkorinnerusinnaanera pillugu isornartorsiuineq Vivian Motzfeldtip KNR-imit apersorneqarnermini qisuariaateqarfigaa.
Nunanut allanut Naalakkersuisutut Partiinit illuatungiliuttuni borgmesteriniillu naammaginartumik peqataatitsinngippallaarnera pillugu oktobarimi pasillerneqarneranik pissuteqarpoq.
Aaja Chemnitzip peqataatitsinngippallaarnermik isornartorsiuineq pissuteqarluartutut taavaa. Aamma Danmarkimut EU-mullu atassuteqarnitsinni periarfissat atorluarsinnaasaraluavut maanna piviusunngortinneqareersimasinnaagaluit erseqqissaatigai. Taamaattumik isumaqatiginninniartoqaqqilerpat nunarput isumaqatiginninniarnermi siuttumik atorfinitsitsinissaa taassuma kissaatigaa. Siunnersuut qanoq isumaqarfigaajuk?
- Aajap partii aallaavigisaa uani isumaqatigiissutip aappaat aamma tunuliaqutaapput. Naalakkersuisooqataapput aamma isumaqatiginninniarnerup aallartinneqarneraninngaanniit naggatissaanut tunuliaqutaallutik tapersersuinikuupput, Vivian Motzfeldt akivoq.
- Soorunami isumaqatiginninniarnerit kissaatit tamaviisa naapertorlugit naammassineqarneq ajorput, illuatungeriit tamarmik piumasaat eqqarsaatigalugu perusutagut tamatta soorunami pisinnaasannginnatsigit. Kisianni uani isumaqatiginninniarnermi isumaqarpunga nunatta kissaatai annertoorujussuarmik tusaaniarneqarsimasut.
Naalakkersuisup isumaqatiginninniarnermi siuttoq pillugu siunnersuut qanoq isumaqarfiginerlugu akissuteqanngilaq.
Nunatta isumaqatiginninniarnerni pikkorinnerulernissaa naleqquttuunerulertariaqartoq, IA-meersup Folketingimi politikerip aalajangiusimavaa.
- Piviusuuvoq, arlaatigut qaffasinnerujussuarmik immitsinnut qiviartariaqartugut. Nunani tamalaani inissisimanerput qaffakkiartuinnaavittussaavoq. Aammattaaq nunarsuaq tamakkerlugu avammut niuernermik aningaasarsiornikkut isumalluuteqarnerput immikkut eqqummaariffeqarnissaa pingaaruteqarpoq, Aaja Chemnitz oqarpoq.
Vivian Motzfeldtip (S) apersorneqarnera tamakkerlugu uani isiginnaarneqarsinnaavoq:
