- Massakkut pilersaarusiorpugut nunap immikkoortuinut ukiup nikinnerani angalalluta qulequttat taamaattut oqallisigissallugit. 

Nunanut allanut Ilisimatusarnermullu naalakkersuisoq, Vivian Motzfeldt (S) KNR-imit sivisuumik apersorneqarnermini oqarpoq.

Apersorneqarnera tamaat allaaserisap matuma ataani takuneqarsinnaavoq.

Vivian Motzfeldt illersornissamut isumaqatigiissutit marluk Danmarkimut ukioq manna isumaqatigiissutigineqartut pillugit politikerinit assigiinngitsunik isornartorsiuineq pillugu ilaatigut apersorneqarpoq.

- Borgmesteri aamma namminneq oqarput peqataatinneqarnikuunatik, naalakkersuisorlu oqarluni peqataatitsisinnaanani isertuussaammat. Kisianni takulissavarput Danmarkimi ministereqarfiit peqataatittarpaat borgmesteritik, tupinnaqaaq, Aki-Matilda Høegh-Dam (N) illersornissamut isumaqatiginninniarnerit kingulliit naammassineqaqqammernerani oqarpoq.

Isornartorsiuineq Vivian Motzfeldtip (S) arlaleriarluni akissuteqarfigaa, uanili aamma akissuteqarfigeqqippaa:

- Isornartorsiutit oqaatigeriikkattut tusaatissatut tiguakka, Vivian Motzfeldt oqarpoq.

- Kisianni pigaarnerpaatut utertikkusutara unaavoq, peqataatitsineq ingerlanneqarsimammat, aamma partiit siuttui tamarmik politikkiminnik ilanngukkusutaminnik anngussissallutik periarfissaqarsimammata, taanna oqarpoq, nangillunilu:

- Taamaammat illua-tungeriippoq, uanga isumaqarpunga peqataatitsisinnaanera naapertorlugu peqataatitsisimallunga. 

- Taamaammat peqataatitsineq peqataatitsinnginneq, qanorlu suleriuseqarneq isumaqarpunga imminut naapertuutinngitsut, pissutigalugu isumaqatiginninniarnerit soorunami illersornissamut tunngasut, taakkua mianereqqissaarlugit matuni matoqqasuni ingerlanneqartarput, taanna oqarpoq, illersornissarlu pillugu isumaqatigiissutit naalakkersuisoqatigiit tamarmik tunuliaqutaanerat erseqqissaatigalugu.

Vivian Motzfeldtip Issittumi illersornissamut isumaqatigiissutit marluk pillugit ajornartorsiutaasut sivisuumik apersorneqarnermini oqaasertalerpai. Uanilu avammut attaveqarneq ilaatigut suliassangaatsiaavoq. Assi © : KNR

Vivian Motzfeldtip illersornissaq pillugu oqallinneq ”ingattarsernermik” ilaqakkajunnerarpaa, aamma ”oqaatsinik innuttaasunut pisariaqanngitsumik toqqissiviilliortitsisunik atuisoqarsimanerarlugu”.

- Oqaloqatigiinnerit siunertarinngisaanik siunertalerlugit ilaatigut paasineqartarsimapput, taanna oqarpoq.

Tunngaviillu kukkusut atorlugit innuttaasut toqqissisimannginnermik siammarterisoqarnera ajornartorsiutaasoq taassuma erseqqissaatigaa.

- Taanna nuannertuusorinngilara aamma nikallornarivara, siunertaa tassaammat illersorneqarnerulluta aammalu susoqarneranut annertunerusumik piginnaanivut qaffasinnerusumut inississallugit, taanna oqarpoq.

Vivian Motzfeldtilu innuttaasunut erseqqissumik attaveqarnissap qulakkeernissaa pissutigalugu nunatsinni innuttaasunut oqaloqatigiinnertalimmik ataatsimiisitsinissamut ukiumi nutaami qaaqqusiniarpoq.

Uanilu innuttaasut Illersornissamut isumaqatigiissutinut tunngatillugu apeqqutissaat qularutigisinnaasaallu oqaluuserineqarsinnaassapput.

- Innuttaasunut tamatsinnut tunngassuteqarmat, annertunerusumik peqataatillugit aamma oqaloqatigiinnerit ingerlanneqarnissaat kissaatigaarput, taanna oqarpoq.

Attaveqaqatigiinnissamut sungiusarneq (ajornakusoortoq)

Naallu Vivian Motzfeldtip innuttaasut oqaloqatiginissaat pisariaqarsorigaluarlugu naalakkersuisut Danmarkimut illersornissamut isumaqatiginninnialernermiilli attaveqatigiinnermi ersarissimasorai. 

- Ullumikkut killiffitsinni ukua isumaqatigiissutit naammassineqarsimasut, pingaaruteqartorujussuuvoq oqaatigissallugu sorsunnermut atugassiaannginneri, kisiannili nunatta illersorneqarneranik, annaassiniaanernut, nakkutilliinermut upalungaarsimanermullu piginnaasat ineriartortitsinerit taakkuupput, taanna oqarpoq.

Sakkutooqarnikkut aasaanerani sungiusartoqarnera aamma nunanit iligisanit tikeraartoqarneq avammut attaveqarnermut aamma nunatta NATO-mut ilaaneranut tunngassuteqarpoq.

- Tassaniippoq ersersitsineq nunatsinninngaanniit, arlaannik nunarput innarlerniarneqassappat immaqaluunniit nunat tamalaat inatsisaat unioqqutillugu iliuuseqarniassappat takutitsineruvoq kisimiinngilagut, illersortissaqarpugut, taanna oqarpoq.

Vivian Motzfeldtip arlaleriarluni oqaatigeriikkamisut partiit Danmarkip nunattalu akornanni isumaqatiginninniarnernut tunngatillugu naammattumik paasissutissiissuteqarfigineqarsimasorai. Assi © : KNR

Tassa sakkutuuliinerunissamut tunngatillugu kimut oqariartuuteqartoqarnera apeqqutaatillugu sammiviit marluk akornanni nikerartuuvoq.

- Isumaqanngilanga saqqummeriaaserput allanngortoq. Ersareqqissaartumik aallaqqaataaninngaanniit isumaqatigiissutit sumik imaqarnerat assigiimmik oqaluttuaraarput, Vivian Motzfeldt oqarpoq.

- Illuatungaatigut nunat allat NATO-mi ilaasortaasut maani nunami najuunnerat oqariartuutit aamma allaapput, taanna oqarpoq. 

Nunatta iluani avammullu attaveqarniarnerup nikerartuutinnera aamma ilungersunarsimasoq, Vivian Motzfeldtip nassuerutigaa.

- Ajornakusoortortaa uaniippoq oqaaserpassuit ullumikkut killiffigisatsinni, amerlasoorujussuupput kalaallisut oqaasertalersinnaanngisagut suli, taamaammat isumaqatigiissutit iluaniipput aamma ilisimatusarnerup iluani oqaatsillu atorneqartut ullumikkut piginnaasanik ineriartortitsinermi kalaallisut suli oqaaseqarfiginngilagut ineriartortissallugit, taanna oqarpoq.

Pingaartumillu oqaaseq “afskrækkelse” (sakkulersortoqarnissaanik pinaveersaartitsineq aaqq.) ajornakusoorsimasoq, erseqqissaavoq.

- Taamaammat ersiortitsinerunngilaq, kisianni takutitsinerugami nunarput tigoriaannaalluni kisimiilluni inissisimanngitsoq, kisianni takutitsineruvoq kisimiinngitsugut ilagineqartugullu, NATO-milu nunarput ilaasoq. Taamaammat sumiiffinni sunalu pineqartillugu oqaluttuaq suna pineqarnera aallaavigalugu oqariartuutit suuneri immikkoortinneqarsinnaasariaqarput, taanna oqarpoq.

Isornartorsiuineq sulinermut allannguinngitsoq

Vivian Motzfeldtip illersornissaqarneq danskit akisussaaffianniinnera pissutigalugu illersornissaq pillugu isumaqatiginninniarnerit peqataaffiginiarnagit aalajangersimasinnaagaluarlugu apersorneqarnermini erseqqissaatigaa.

- Pingaarnerpaatut oqaatigerusuppara toqqarsimasinnaagaluarparput isumaqatiginninniarnermi peqataassanata, taama iliorsimanngilagut akisussaaffimmik tiguseqataalluta isumaqatiginninniarnerit peqataaffigaagut, taanna oqarpoq.

Vivian Motzfeldtili peqataatitsisoqarnerunissaa pisariaqarnerarlugu isornartorsiuisoqarnera allaanerusumik iliuuseqartalernissaanut eqqarsalersitsinersoq aperineqarami ima akissuteqarpoq:

- Isumaqatiginninniarnerit mianernartut nunap illersorneqarneranut tunngasut, matoqqasuni  ikitsuaraarakasinnik peqataatitsiffiusuni ingerlanneqartarput. 

- Taamaammat takorloorsinnaanngilara soorlu aamma ilaatigut oqariartuutigineqarpoq, inersuarmi inatsisartut ataatsimiittarfianni tamakkua oqallisigineqartariaqartut. Illersornissamut tunngasut mianernartuupput taamaammat kikkut tamaasa peqatigalugit isumaqatiginninniarnerit ingerlanneqarneq ajorlutik, Vivian Motzfeldt oqarpoq.

Vivian Motzfeldtip (S) apersorneqarnera tamaat takuneqarsinnaavoq uani: