Naalakkersuisut danskillu naalagaaffiata illersornissamut isumaqatigiissutertik sapaatip-akunnerata siuliani saqqummiuppaat.

Inatsisartunut ilaasortat ilaasa innuttaasullu taamatut isumaqatigiittoqarnera tusagassiuutitigut saqqummiunneqarmat aatsaat amerlasuut tusarpaat.

Naalakkersuisuniillu taamatut akuutitsisoqaranilu  ilisimatitsisoqarsimannginnera, partiit naalakkersuisoqataasut – Inuit Ataqatigiit, Siumut aamma Demokraatit – illua tungiliuttullu partiani Naleqqameersup isornartorsiungaatsiarpaat.  Tamanna KNR-ip aallakaatitassiaani Oqalliffimmi tallimanngornermi pivoq.

Aki-Matilda Høegh Dam Naleqqamiit oqallinnermi peqataavoq, taassumalu peqataatitsinnginneq ima isornartorsiorpaa:

- Borgmesteri aamma namminneq oqarput peqataatinneqarnikuunatik, naalakkersuisorlu oqarluni peqataatitsisinnaanani isertuussaammat. Kisianni takulissavarput Danmarkimi ministeriaqarfiit peqataatittarpaat borgmesteritik, tupinnaqaaq.

Pipaluk Olsen Demokraatineersoq tallimanngornermi oqallitsitsinermi aamma tusarsaavoq. Suliamilu taama annertutigisumi peqataatitsineq pitsaanerusinnaasoq, taanna isumaqarpoq:

- Partiilersuuffiunani una suliaq taama annertutigisoq tigusariaqaripput, aamma oqaloqatigiinneq pingaaruteqartuusoq pissusissamisoorsorinngilara borgmesterit tusagassiuutitigut paasitinneqarnissaat imaluunniit inatsisartut. Kisialli ataqatigiinneq oqaloqatigiinnerlu inerisarneqarnissaa erserpoq aamma tamanna, taanna oqarpoq.

Isumaqatigiissummi issittumi sakkutuut Nuummi illutaarnissaanut aningaasaliinissaq aamma Nuummi talittarfiup tallineqarnissaa ilaapput. Tamakkulu isumaqatigiinniutigineqarneranni nunatsinni innuttaasut peqataatinneqarnerusimasariaqaraluartut, Siumup siulittaasua, Aleqa Hammond, Oqalliffimmi aallakaatitsivimmiilluni oqarpoq.

- Isornartorsiorparput periutsit taama ittut inuiaqatigiinnut annertuumik pingaaruteqarluinnartut Kalaallit Nunaata minnerpaamik peqataaffigisariaqarpaa naalakkersuinikkut suunuku isumaqatigiissutaasimanersut. 

Inuit Ataqatigiinneersoq, Pipaluk Lynge, isumaqataavoq.

- Pipaluk Olsen Aleqa Hammondilu isumaqatigisorujussuuakka, taanna oqarpoq.

Hammond: Danskit ingerlatseriaasiat ajornartorsiutaavoq.

Illersornissamut isumaqatigiissut nutaaq pillugu isornartorsiuineq, Siumumeersoq Nunanut allanut Sillimaniarnermullu Naalakkersuisoq Vivian Motzfeldtimut sammitinneqarneruvoq.

Borgmesterinit marlunniit isornartorsiuneq tallimanngornermi akissuteqarfigaa nassuiaallunilu:

- Sakkortusisamik nipangiussisimasussaatitaanerup aqqani avitseqatigisinnaasagut ataatsimiititaliaq susassaqartoq, taavalu partiit Inatsisartuni qinigaatitaqartut siuttui, Vivian Motzfeldt oqarpoq nangillunilu:

- Taanna erseqqissarusuppara, soorunami innuttaasut qinigaat apeqqusersorneqarneq ajorput, kisiannili atorfilittat sulianik ukuninnga kivitsissagunik immikkut paasissutissanik avitsivigineqarnissaminnut sikkerhedsgodkenderneqaqqaarlutik (isumannaallisaanermi akuerisaaqqaarlutik), ingerlattussaavaat. Taamaammat suliat kikkunnut imaaliallaannaq avitseqatigiissutigineqarsinnaanngitsut pineqarput.

Taamatullumi oqarnera (Siumumi) partiip siulittaasuata tallimanngornermi oqaalitsitsisoqarnerani taperserpaa.

- Ilungersunartortaata ilagivaa oqartussaaffik uagut oqartussaaffiginngisarput pineqartillugu aalajangernissarlu tamakkiisoq Danmarkimiitsillugu, qallunaat periusiannik aallaaveqarpoq. Kissaateqarsimapput una matoqqasumik ingerlanneqassaaq isertuussaammat, illersornissamut isumaqatiginninniarnerummat avammut suaartaatigineqannginnissaa kissaatigineqarsimavoq, Aleqa Hammond oqarpoq.