Vivian Motzfeldt borgmesterinut: Aalajangersimasuinnarnik avitseqateqarsinnaavugut
Naalakkersuisut danskillu naalagaaffiata illersornissamut isumaqatigiinniarneranni paasissutissat immikkut isertuussaapput, Inatsisartunilu partiit siuttui sillimaniarnermullu ataatsimiititaliami ilaasortat kisiisa paasissutissinneqarsinnaasimapput.
Borgmesterit marluk isumaqatigiinniarnerni peqataatinneqanngiivinnerminnik nalunaaruteqareersut, nunanut allanut tunngasunut naalakkersuisoq, Vivian Motzfeldt taama oqarpoq.
- Sakkortusisamik nipangiussisimasussaatitaanerup aqqani ataatsimiititaliaq susassaqartoq, taavalu partiit Inatsisartuni qinigaatitaqartut siuttui kisiisa avitseqatigisinnaasimavagut, Vivian Motzfeldt malittarisassaminnik nassuiaalluni oqarpoq.
Partiit siuttui anngussinissamik periarfissaqarsimasut, iluamillu aalajangiiumallutik paasissutissanik suliaqartitsisarsimallutik taanna aamma paasissutissiivoq.
- Taakkua paasissutissat suliaritinnikuusagut ilai illersornissamut tunngassuteqarmata allaat ima isertugaatigisumik inissisimasarput, ininut immikkut ittumik sillimmasersukkanut aatsaat iseqqaarluni atuarneqarsinnaallutik.
Sunnerneqartussaagaluarlutik peqataatinneqanngitsut
Illersornissamut isumaqatigiissut sapaatit akunnerata siuliani saqqummiunneqarpoq.
Nuummi umiarsualiviup allilerneqarnissaanut Kangerlussuullu mittarfiani pitsanngorsaanissamut aningaasaliisoqassasoq isumaqatigiissutaasunut ilaapput.
Kommuneqarfik Sermersuulli borgmesteriata, Avaaraq Olsenip, Qeqqata Kommuniatalu borgmesteriata, Malik Berthelsenip, taama isumaqatigiittoqarsimanera isumaqatigiissutip tallimanngormat saqqummiunneranni aatsaat paasivaat.
Aningaasaliinissat kommuninut sunniuteqartussaammata, isumaqatigiinniarnerni peqataatinneqartariaqaraluarlutik taakku isumaqarput. Tamannalu pitsaanerpaasimassagaluartoq Vivian Motzfeldtip nassuerutigaa.
- Tunuliaqqutserlugit soorunami suliassaapput, inuiaqatigiinni demokratiskiusuni inuuvugut, amerlanerussuteqartut ingerlavigerusutaat sapinngisamik qulequttami uani innuttaasut qinigaat tamarmik peqataatillugit naammassiffeqassalluni neriunarsimagaluaqaaq, kisianni aamma naggataatigut ulloq takkuttarpoq, aalajangernissamik piumasaqarfiusoq, Vivian Motzfeldt oqarpoq.
Kikkunnik avitseqateqarsinnaaneq aamma killeqartoq naalakkersuisoq oqarpoq. Paasissutissallu isertuussaaneri unammillernartoqartitsoq, nangilluni oqarpoq.
- Taanna erseqqissarusuppara, soorunami innuttaasut qinigaat apeqqusersorneqarneq ajorput, kisiannili atorfilittat sulianik ukuninnga kivitsissagunik immikkut paasissutissanik avitsivigineqarnissaminnut isumannaallisaanermi akuerisaaqqaarlutik ingerlattussaavaat. Taamaammat suliat kikkunnut imaaliallaannaq avitseqatigiissutigineqarsinnaanngitsut pineqarput, nunanut allanut tunngasunut naalakkersuisoq oqarpoq.
