Illersornissamut isumaqatigiissut oqallisigineqareersorlu kattuffiit innuttaasunut ataatsimiititsilersut

Folk & Sikkerhed aamma UNICEF Kalaallit Nunaanni Nuummi innuttasunut ataasinngorpat ataatsimiititsissapput. Issittoq pillugu isumaqatigiissut immikkoortortat aappaat pillugu apeqqutilliisoqarsinnaassaaq pisorlu pillugu meeqqat inuusuttullu qanoq oqaloqatigineqarsinnaanerat pillugu siunnersuisoqassalluni.
Innuttaasunut ataatsimiititsineq Katuami ataasinngorpat pissaaq. Assi © : Johan Nilsson/TT/Ritzau Scanpix
oktobarip 27-at 2025 10:57
Nutserisoq Medea Olsen

Illersornissamut isumaqatigiissutip aappaa – Issittoq aamma Atlantikup Avannaa pillugit isumaqatigiissutip immikkoortuisa aappaat  – naalakkersuisuit danskit naalakkersuisuisalu akornanni isumaqatigiissutaasoq, oktobarip qulingani saqqummiunneqarmat, oqallinnermik annertuumik pilersitsivoq

Dronet nutaat, Issittumi umiarsuassat marluk, Issittumi Sakkutooqarfiup Nuummi qullersaqarfissaa nutaaq kiisalu Nuummi Kangerlussuarmilu talittarfiit allilerneqarnissaat, isumaqatigiissutip ilaatigut imarivai.

Oqallinneq suli pisoq pissutigalugu, kattuffiit Folk & Sikkerhed aamma UNICEF Kalaallit Nunaat Nuummi innuttaasunik ataatsimiititsissapput. 

Inuit illersornissamut isumaqatigiissut pillugu ataatsimiititsinermi immikkut ilisimasalinnut Danmarkimiit attaveqaatikkut peqataasussanut apeqquteqarsinnaajumaarput. Folk & Sikkerhed naapertorlugu inuit pisinnaatitaaffiinik immikkut ilisimasalik Kenneth Øhlenschlæger Buhl, upalungaarsimaneq pillugu immikkut ilisimasalik Johnny G. Larsen aamma qarasaasiatigut sulinermik immikkut ilisimasalik Troels Ørting Jørgensen, ataatsimiititsinermi immikkut ilisimasalittut peqataassapput.

- Ilisimasaqalernissaq, oqaloqatigiinnissaq paaseqatigiinnissarlu kissaatigaagut.
Illersornissap, isumannaallisaanerup upalungaarsimanerullu ammasumik alapernaatsumillu oqaluuserinerisigut, siunissami iliuuseqarnissamut tamatta piareersimanerussaagut, Rasmus Lohse, Folk & Sikkerhed – Kalaallit Nunaanni siulittaasoq oqarpoq

Folk & Sikkerhedip nittartagaa naapertorlugu, kattuffik danskiuvoq illersornissamut upalungaarsimanermut isumannaallisaanermullu politikki pillugu partiinut attuumassuteqanngitsumik paasissutissiisartoq. Kattuffik nunatsinni najugaqartunik sammisassaqartitsisartunik attaveqarfeqarpoq.

Meeqqat inuusuttullu ukkatarineqartut

Nunatta politikkikkut soqutigineqarnera pillugu apeqqutillu pingaarutillit illersornissamut isumaqatigiissummut tunngasut pillugit, inersimasut meeqqat inuusuttullu qanoq oqaluussinnaaneraat aamma sammineqassaaq.

- Nunarsuaq nalorninartumiittutut misiginarsigaangat meeqqat inuusuttullu inersimasunik – unneqarissumik, eqqissisimasumik, neriuuteqarpalaartumillu oqaloqatiginninnissamut sapiissuseqartunik pisariaqartitsilersarput. Meeqqat inuusuttullu nutaarsiassanik ilaannakortunik tusakulasarnerat, nunarsuatta navianartorsiorfiuneranik misigititsinerulersinnaavoq, UNICEF Kalaallit Nunaanni suliniutinut pisortaq, Tina Dam, tusagassiuutinut nalunaarummi oqarpoq.

Nangipporlu:

- Taamaammat uagut inersimasutut toqqissinartunik toqqammavissiissaagut meeqqallu qanoq pisoqarneranik paasinninnissaannut periarfissillugit, ernumassutiminnik oqariartuuteqarsinnaanissaannut aamma periarfissaqarnissaat qulakkeerlugu. Meeqqat inuusuttullu ataatsimoornitsinni pingaaruteqarput aaqqiissuteqarniarnitsinnilu peqataatittariaqarpagut, Tina Dam oqarpoq. 

Quppersagaq qanoq iliorluni ilimaginngisanik inuiaqatigiit nalinginnaasumik ingerlaasaannut sunniuteqarsinnaasunik pisoqariataarsinnaaneranut sillimaniartoqarsinnaanera pillugu siunnersuutinik nalinginnaasunik imalik innuttaasunut ataatsimiititsinermi tunniunneqassaaq.

Innuttaasunut ataatsimiititsineq Katuami ataasinngornermi unnukkut arfineq-marluniit qulingiluat tungaanut ingerlanneqassaaq.

Isumaqatigiissut pillugu tusagassiortunik katersortitseqqinneq

 Naalakkersuisut siulittaasuat Jens-Frederik Nielsen (D) nunanullu allanut tunngasunut naalakkersuisoq Vivian Motzfeldt (S) illersornissamut isumaqatigiissut pillugu tallimanngornermi immikkut ittumik tusagassiortunik katersortitsipput. Sakkortuumik oqallittoqareersoq tamanna pivoq. 

Isumaqatigiissut, pingaartumillu Nuummi suliniutit nutaat, partiimit illuatungiliuttumit Naleqqamit sakkortuumik isornartorsiorneqarnikuupput.

Isumannaallisaanissaq siunertaralugu isumaqatigiissuteqartoqarsimasoq, Jens-Frederik Nielsenip Vivian Motzfeldtillu tusagassiortunik katersortitsinermi erseqqissarpaat.

- Nunatsinnut aarlerinartoqanngitsoq oqaatigerusuppara, Jens-Frederik Nielsen oqarpoq.