Nunanut allanut pisortaqarfiup pisortaata soraarsitaanera akisuupilussuusoq
Allaaserisaq Tusagassiinermut tunngasuni aalajangiisartunit isornartorsiorneqarpoq.
Vittus Qujaukitsup sapaatit-akunnialui matuma siorna naalakkersuisuujunnaarnerata kingorna, Suka K. Frederiksen nunanut allanut naalakkersuisutut nutaatut Issittumi Siunnersuisoqatigiit Alaskami ulluni makkunani ataatsimiinneranni peqataavoq.
Taamaalillunilu nunanut allanut pisortaqarfimmi pisortaq misilittagartooq Kai Holst Andersen, ukiuni sisamani atorfeqareerluni sapaatit-akunnerata siuliani ataasinngornermi soraarsitaasoq ikiortigisinnaanngilaa.
Soraarsitsinerli atassuteqarfigisatigut ukiunilu arlalinni ilisimasatigut misilittakkatigullu annaasaqarfiuinnassanngilaq.
Kai Holst Andersenimmi soraarsitaanermigut, malittarisassat malillugit qaammatini 18-ini akissarsiassat amerlaqataanik soraarnermi immikkut pissarsiassaanut nunatta karsiata 1.622.306 koruunit aningaasartuutigissavai.
AAMMA ATUARUK Vittus akerliugami naalakkersuisuujunnaartoq
Kai Holst Andersen Namminersorlutik Oqartussani nunanut allanut pisortaqarfimmi pisortatut 2002-mi juunip qaammataani atorfeqalerpoq.
Nunanullu allanut pisortaqarfimmi pisortaanermini Kai Holst Andersen Pituffik pillugu suliami kukkuluttortoqarneranut pingaarnertut akisussaatinneqarpoq, kiffartuussinissamik isumaqatigiissut Greenland Contractorsip annaammagu amerikamiullu ingerlatseqatigiiffiannut Exelis Servicesimut tunniunneqarluni.
AAMMA ATUARUK Kai Holst Andersen akisussaanerpaavoq
Kai Holst Andersen suliamik Naalakkersuisunut, taamani Aleqa Hammondimit siuttuuffigineqartunut, naalakkersuisutigoortumik suliassanngortitsisimannginnini pillugu taamani akisussaatinneqarpoq.
AAMMA ATUARUK Eqqartuussisuserisup misissuinera: Hammond nunanullu allanut tunngasunut pisortaqarfik takkuitsuuipput
AAMMA ATUARUK Pituffimmi kiffartuussinissamik isumaqatigiissutip annaaneqarnera
