PITUFFIK Kai Holst Andersen akisussaanerpaavoq
Nalunaarusiami erserpoq novembarimi ullut pisoqarfiusimasut. Novembarip ulluisa 15-anni Namminersorlutik Oqartussat piumasaqaatinik allannguinissamut siunnersuutitik danskit Nunanut Allanut Tunngasunut Naalakkersuisoqarfiannut nassiuppaat. Ullulli pingasuinnaat qaangiuttut Nunanut Allanut Tunngasunut Naalakkersuisoqarfik siunnersuummik allamik allanngungaatsiarsimasumik nassiussivoq, allannguutillu kinguneraat Exelis Services suliariumannittussarsiuussinermut neqeroorsinnaalermat.
Aamma atuaruk ATAATSIMUT ISIGALUGU Pituffimmi kiffartuussinissamik isumaqatigiissutip annaaneqarnera
Suliariumannittussarsiuusinermi piumasaqaatinik Kai Holst Andersenip akuersisimanini allakkatsigut Aleqa Hammondimut, suleqatigisimasaminullu Svend Hardenbergimut nalunaarutigisimaneraa nalunaarusiami uppernarsineqanngilaq.
Pituffik pillugu suliariumannittussarsiuusinermi piumasaqaatit allanngortinneqarneranni atorfilittanit eqqartuussissutigoortumik kinguneqartussamik kukkuluttortoqarsimanngitsoq, Pituffik pillugu nalunaarusiami qulaarneqarpoq.
Aleqa Hammond akisussaaqataavoq
Nalunaarusiami erserportaaq Kai Holst Andersen aamma Svend Hardenberg Aleqa Hammondimut saaffiginnimmata, Aleqa Hammond suliassat politikkerinut suliassaangitsutut nalinersimagai.
Nalunaarusiaq malillugu suliaq aallarteqqammiinartoq Aleqa Hammondip atorfilittaminnut suliaq tunniussimagaa erserpoq, atorfilittallu ima isummerput:
- Aleqa Hammondip piumasaqaatit politikkerinut suliassaangitsutut atorfilittannullu suliassaasutut paasisimallugu oqaatigaa.
Allatut oqaatigalugu suliariumannittussarsiuussinermi atugassat politikkikkut isummerfigisassatut nalilersimanngilai.
Tassa danskit Nunanut Allanut Tunngasunut Naalakkersuisoqarfianiit Aallartitaqarfimmiillu Nunanut Allanut Tunngasunut Pisortaqarfimmiit piumasaqaatit akuersaarneqarsimapput.
Piumasaqaatit nutaat Nunanut Allanut Naalakkersuisoqarfimmeersut Naalakkersuisoqarfimmiit akuerineqaqqaartariaqarsimasut eqqartuussisuserisoq Ole Spiermann isumaqarpoq.
Svend Hardenbergip atuuffia
Naalakkersuisup siulittaasuata naalakkersuisoqarfiani pisortaasimasup, Svend Hardenbergip, suliariumannittussarsiuussinermut malittarisassat allanngortinnissaannut akuersineranik isornartorsiornissaanut nalunaarusiami tunngavissaqarsimanngilaq.
Nunanut allanut tunngasunut naalakkersuisoqarfiup suliariumannittussarsiuussinermi malittarisassat nutaat akuerinnginneranni Kai Holst Andersenip taamani naalakkersuisoqarfimmi pisortaasimasoq paasitissimaneranik Ole Spiermann allakkatigut takussutissaqarsimanngilaq.
Svend Hardenbergili oqarluni akuersisimanerarlugu Kai Holst Andersenip oqaatigaa, naalakkersuisoqarfimmili pisortaasimasoq taama oqarsimannginnerarpoq.
