Arnat 1992-ip kingorna piumasarinngisaminnik naartunaveersaasersorneqarsimanertik pissutigalugu taarsiivigineqarnissamik qinnuteqartut 100-t, qinnuteqaatimik naammassineqarnissaannut suli utaqqisariaqarput. 

Naalakkersuisut arnat naartunaveersaasersorneqarsimasut 300.000 koruunit tungaannut taarsiivigineqarsinnaanissaminnut qinnuteqartitsisarnerat oktobarimi ukioq ataasinngussaaq. 

Naalakkersuisut qinnuteqaatit februaarip aallaqqaataanni naammassereersimassagatikkaluarpaat. Naatsorsuutigisamiilli qinnuteqartoqarnerunera pissutigalugu piffissaritinneqartoq kinguartinneqartariaqarsimavoq. 

Taavalu suliat septembarimi naammassineqassangatinneqarsimagaluarlutik. 

Qinnuteqaatilli suli suliarineqarput. Arnat tallimat maannamut qinnuteqaatiminnik taperserneqarput, qinnuteqaatillu 109-t suli suliarineqarlutik. Tamanna Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfik KNR-imut paasissutissiivoq. 

Arnaq Knudsen-Frederiksenimut, arnat taarsiivigineqarnissamut qinnuteqarsimasut ilaannut, utaqqineq sivisuutut misinnarpoq. 

- Pakatsinarpoq. Ukioq manna taarsiivigineqarnissarput neriorsuutigineqarpoq maannali allanngortinneqaqqippoq. Uggornarpoq, taanna oqarpoq. 

Arnaq Knudsen-Frederiksenip, KNR-imut siornatigut oqaluttuareersup, spiralilerneqarsimanini 2002-mi paasivaa.

Taassuma oqaluttuarnera naapertorlugu ukiut tallimat sioqqullugit, tassa 15-inik ukioqarluni Paamiut napparsimmavianni peersitigami naartunaveersaaserneqarsimavoq.

Taassuma naartunaveersaaserneqarnissani nakorsarlu peersitsereernermi kingorna eqqartorsimanagu oqaluttuaraa.

Suliat piaartumik suliarineqarnissaat sulissutigigaat

Qinnuteqaatit qaqugu naammassillugit suliarineqarnissaat naatsorsuutigineqarnersoq naalakkersuisoqarfimmit ilisimatitsissutigineqarsinnaasimanngilaq.

Naalakkersuisut qinnuteqaatit eqqartuussissuserisup suliffeqarfiutaanut Frederiksen Lawimut misissortippai.

Allakkami Frederiksen Lawimeersumit, KNR-ip takusaani, eqqartuussissuserisut allapput, nakorsanit journalit pissarsiariniarneri naatsorsuutigisamit piffissamik atuiffiunerusimasut.

Journalit nunatsinni sumiiffinni assigiinngitsuni toqqorsivinniinnerat tamatumunnga ilaatigut pissutaavoq. Sulianilu arlalinni nunatta toqqorsivianit paasissutissanik pissarsiniartoqartariaqartarsimasoq, allakkami allassimavoq.

Naalakkersuisoqarfiup suliat sapinngisamik naammassipallanneqarnissaat sulissutigineqartoq, suliallu tamarmik qaammatit tallimat qaangiutsinnagit naammassineqarnissaat naatsorsuutigineqartoq, allakkami juunimeersumi allassimavoq.

Meeqqanut, Inuusuttunut Inatsisinut Atuutsinneqarnerannut Naligiissitaanermullu Naalakkersuisoq, Mariane Paviasen Jensen (IA), KNR-imit apersorumaneqaraluarpoq, tamannali piffissaliussap killingata qaangiutinnginnerani pisinnaasimanngilaq.

Mariane Paviasen Jensenip oqarnera naapertorlugu peqqissutsimut paasissutissanik pisariaqartunik pissarsiniarneq naatsorsuutigisamit sivisuneruvoq. Assi © : KNR

Arnaq Knudsen-Frederiksenip isornartorsiuinera naalakkersuisunut saqqummiupparput.

- Naalakkersuisut suliap suliarineqarnerata kingusinaarunneqarnera, journalit peqqissutsimut tunngasut ilai pissarsiariuminaannerannik ilaatigut pissuteqartoq, ajuusaarutigaat, Mariane Paviasen Jensen allakkatigut akissuteqaatimini allappoq nangillunilu:

- Naatsorsuutigisamit aamma amerlanerujussuarnik qinnuteqartoqarnikuuvoq, aammattaaq paasissutissanik peqqissutsimut tunngasunik pisariaqartitanik sineriammit pissarsiniarneq naatsorsuutigineqaqqaartumit sivisunerusimavoq. Tamanna suliat suliarineqarneranni piffissamik atuinermut sunniuteqarpoq.

- Qinnuteqaatit pimoorussamik assigiissaartumillu suliarineqarnissaat naalakkersuisunut tunngaviusumik pingaaruteqarpoq. Taamaattumik suliamik suliaqarnerup kinguaattoornera ajuusaarutigaarput, taamaattoqarneranullu paasinnittoqarnissaa neriuutigalutigu.

"Inuuninni misigisimasanni ajornerpaaq”

Naalakkersuisut siulittaasuat, Jens-Frederik Nielsen (D), arnanut eqqugaasunut ukioq kingulleq septembarimi utoqqatserpoq. 

- Utoqqatserneq – oqaaseq annikikkaluassusia isumalerujussuusinnaavorli akuerigaanni.

- Peqqinnissaqarfiup nunatsinnit akisussaaffigineqalernerata kingorna pisimasoq akuersaarneqarsinnaanngitsoq arnat inuusuttunnguit ilaannut ingerlateqqinneqarsimasoq pillugu Naalakkersuisut sinnerlugit utoqqatserpunga, Jens-Frederik Nielsen oqaluttarfimmit oqarpoq.

Tamanna Nuummi utoqqatsertoqarnerani, ministeriunerup Mette Frederiksenip Danmark sinnerlugu arnanut spiralilersuisimanikkut mamianartuliami arnanut eqqugaasunut aamma utoqqatserfigisaani, pivoq.

Arnaq Knudsen-Frederiksen akuersinertaqanngitsumik spiralilerneqarami 15-inik ukioqarpoq.  Assi © : Johansinnguaq Olsen, KNR

Arnaq Knudsen-Frederiksenip misigisaa annernartoq, taarsiissutinit utoqqatsernermilluunniit peerneqarnavianngilaq. Naalakkersuisulli akisussaaffimmik tigusinerat taassumunnga pingaaruteqarpoq.

Taanna aqqusaakkami kingorna meerartaarsinnaajunnaarluni oqarpoq.

- Naartulersinnaananga ilisimatinneqarnera inuuninni misigisimasanni ajornerpaavoq. Meerartaassanngilanga ernutartaassanangalu, sakkortoorujussuuvoq, taanna oqarpoq.

Kalaallit arnat danskit naalagaaffiata peqqinnissaqarfimmut akisussaaffeqarnerani spiralimik imaluunnit Depo-Proveramik 1992-ip siornatigut akuersitinneqaratik  naartunaveersaaserneqartut naalagaaffimmit 300.000 koruuninik taarsiissuteqarfigineqarsinnaapput.

Arnat 122-t danskit naalagaaffiannit taarsiiffigineqarsinnaatitaallutik septembarimi nalunaarfigineqareerput.