Arnaq Knudsen-Frederiksenip oqaluttuarnerani pisimasoq takorloorneqarsinnaasutut ippoq. 15-inik ukioqarluni naartuneq, naartuersinnerlu kingornatigut anniarujussuarneq majuartarfikkut qummut ammullu ingerlaniarnermik ajornakusoortitsisoq.

Aatsaat 2002-mi naartuersinneranit ukiut tallimat qaangiuttut nassuiaatissarsivaa.

Nakorsarmi spiralimik Arnaq Knudsen-Frederiksenip nammineq pilerneqarnerminik eqqaamanngisaanik nassaarpoq.

- Kingornatigut misissutsit misigisakka oqaatsinik nassuiarneqarsinnaasorinngilakka. Annilaaqqaneq. Tupaqqaneq. Aliasunneq, taanna oqarpoq.

Nunatsinni naartunaveersaatilersuineq pineqartoq DR-ip siorna aallakaatitassiarisaatigut 1960-ikkunni 70-ikkunnilu danskit oqartussaasuisa kalaallit inuisa amerliartorneranut unikaallatsitsiniarlutik kalaallit niviarsiaqqat arnallu spiralilersorsimagaat saqqummiunneqarpoq. Arnat arlallit spiralilerneqarsimanertik inuunerminni kingusinnerusukkut kingunerluutigalugu anniaatigisimaqalugulu oqaluttuaraat.

Piffissamili aamma kingusinnerusukkut nammineq piumassuserinngisaminnik spiralilertittoqartarsimavoq. Nakorsaaneqarfiup arnat akuersissuteqaratik spiralilerneqarneq allatigulluunniit naartunaaveersaaserneqarsimaneq nalaassimagunikku naammagittaalliuteqassasut 2022-mi kaammattuutigaa.

Nakorsaaneqarfiup arnat 1992-ip kingornatigut akuersissuteqaratik naartunaveersaaserneqarsimasut pillugit suliat 14-it ilisimallutik qaammatip siuliani paasissutissiissutigaa. Nunatta peqqinnissaqarneq danskit naalagaaffiannit 1992-imi tiguaa.

Oqaluttuat assingi uteqqiasoq

Arnaq Knudsen-Frederiksen 1997-imi 15-inik ukioqarluni naartulerpoq. Taanna anaananngornissaminut inuusuppallaarsorivoq. Naallu aliasungaatsiaraluarluni eqqortumik aalajangiinissaq ataasiinnaavoq.

Taamani najugaqarfimmi Paamiuni napparsimmavimmi danskimit nakorsaminit naartuersippoq. Tamatumalu kingorna naartunaveersaateqassanersoq oqaluuserinngisaannaritsik oqaatigaa.

Naartuerseqqammernermini anniartalerpoq.

- Annialeraangama nakorsiartarpunga, misissoqqullunga sooq misissoqqullunga. Misissorluarneq ajorpaannga nipaallisaatinik tuneriarlunga angerlartittarpaanga, Arnaq Knudsen-Frederiksen, ullumikkut Nuummi najugaqartoq oqarpoq.

Taanna taama oqaluttuassalik kisimiinngilaq.

Nivi Willep, Qaqortumi tarnip pissusianik ilisimasalik namminersortup oqarnera naapertorlugu spiralit qangali kisimi pisuunngillat.

Taassuma arnat qulit Arnaq Knudsen-Frederiksenitulli 1990-ikkut kingorna naartuersinnerminnut atatillugu spiralilerneqarsimanertik pissutigalugu oqaloqateqartarsimasut ilisimavai.

Taakkunannga marluk 1990-ikkut naaneranni pisuupput, arfineq-marlullu ukiut qulit kingulliit ingerlaneranni pisimasut, taassuma oqaatigaa.

- Naartuersissimasut assinganik anniarujussuartarsimasut nalullugulu sooq anniartarnerlutik kingornalu spiralilerneqarsimallutik paasisimasaraat tusaraangakku tupaallaatigisorujussuusarpara, Nivi Wille 2018-imili tarnip pissusianik ilimasaqalersoq, oqarpoq.

Nivi Willep arnat ilaasa allanik misigisaqarsimanerminnut atatillugu oqaloqatiginnittarnerminnut atatillugu spiralilerneqarsimanertik oqaluttuarisimavaat. Arnat allat oqaloqatiginnittarnermi nalaani spiralilerneqarsimanertik aatsaat paasisimavaat.

- Arnat arlallit oqaloqateqartarnerminni paasisarpaat, pissutigalugu nakorsap nalunaarsuiffiannik misissuisaratta. Taakkulu spiraleqartoq allassimasoq takugaangamikku annilaartarput, taanna oqarpoq.

Meerartaarsinnaannginneq mattunnermik kinguneqartoq

Arnaq Knudsen-Frederiksenip nammineq piumassuserinngisaminik spiralilerneqarnera inuuneranut kingunerluuteqangaatsiarpoq.

Taassuma nakorsap spiralimik nassaarnerata kingunerani spirali erngertumik peeqquaa. Tamannalu annernangaatsiarsimasoq, oqaatigaa.

- Spirali takujumanikuuara, taava nerriviup qaavaniittoq takuara. Amertaqarpoq aattaqarlunilu, nippussuussimanerata takussutissartaanik, taanna oqarpoq.

Arnaq Knudsen-Frederiksen piffissami tassani 20-liisimavoq, taamanilu uinilu angajoqqaanngoqitigiinnissartik takorluugarilersimavaat. Spirali peerneqareermat naartulerniartarsimagaluarpoq.

Iluatsissanani. Ukiut ingerlanerani aappariit ikiorniarneqarniarlutik nakorsamukartuarsimapput.

Aatsaat ukiut 18-it qaangiuttut Arnat Knudsen-Frederiksen 38-nik ukioqalereersoq takorluugaq taanna unitsippaat. Piffissami tassani nakorsiarnerpassuit mannissaqarfimmiillu peersilluni pilersitsiniarnerpassuit nalaatereersimavaat.

- Arnaanera naammanngitsoq misigisimavunga, ukiorpassuarnilu mattullunga. Anaananngornissara kissaatigiuaannarsimavara, taamaammat iluatsissinnaannginnera akueriuminaassimavoq.

Arnaq Knudsen-Frederiksenip spiralilerneqarsimanini qitornaqannginnerminut pissutaasoq ilimagaa. Tamanna nakorsat aamma nassuiaatigigaat, taanna oqarpoq.

- Nakorsat spirali siusippallaartumik ikkunneqarsimasinnaanerarpaat, illiarami suli maminneqanngimmat.

Det har ikke været muligt at få bekræftet, da vi ikke har adgang til hendes journal.

Nakorsanut tatiginnikkunnaartoq

Nivi Willep oqarnera naapertorlugu suliat politikkikkut sammineqarnerunissaat pingaaruteqarpoq. Taassumami arnat akuersissuteqaratik spiralilerneqarnerat oqartussat tungaanniit naapertuilluanngitsuliorfiginninnerusoraa.

- Timip akuersissuteqarfiginngisamik akornusersuisoqarnera malugisinnaavaa. Tamanna assigiimmik kingunerlutsitsisarpoq, tamanna kinguaassiutitigut naapertuilluanngitsuliorfiusuni takuneqakkajuttarpoq.

- Arnat arlallit anniarujussuartarsimapput aamma naak arlaleriarlutik ikiortissarsioraluarlutik meerartaarsinnaannginnertik ilisimasimanngilaat. Tamanna tarnikkut timikkullu kingunerluuteqangaatsiarsinnaavoq, taanna oqarpoq.

Naak Nakorsaaneqarfiup arnat nammineq piumassuserinngisaminnik naartunaveersaaserneqarsimasut naammagittaalliuteqarnissaannik kaammattuuteqarfiginikuugaluarai tassunga atatillugu iliuuseqarnissaq ajornakusoorsinnaavoq, Nivi Wille oqarpoq.

- Aaqqissuussaanermut anniaateqarnermut pisuusumut naammagittaalliuteqarniarneq nukissaqarfigineqarlunilu unammillerfiusariaqarpoq, taanna oqarpoq.

Misigissuseq taanna Arnaq Knudsen-Frederiksenip ilisimavaa. Taassuma misigisimasani Nakorsaaneqarfimmut suli naammagittaalliutiginngilaa. Taassumami tamanna periarfissaasoq ilisimasimanngilaa. Tamatuma saniatigut ukiorpassuit qaangiuttoq misigisimasani aatsaat nipituumik oqaatiginnaanngorsimavaa.

- Tatigisinnaajunnaarsimavakka. Anniartarama eqqarsartarama immaqa arlaannik qimataqarsimasut, taanna oqarpoq.

Arnaq Knudsen-Frederiksen tiitorfimminit tungujortumit “anaana”-mik allagartalimmit najorsivoq. Arnaq Knudsen-Frederiksen uialu naak ukiorpassuit meerartaarsinnaasimanngikkaluarlutik ullumikkut angajoqqaajupput. Taakkumi 2021-mi niviarsiaqqamik qitornavissiartaarput.

- Paninnut oqartuarpunga, asasara, anaana ukiorpassuit utaqqinikuuvoq.

Nakorsap nalunaarsugai tammartut

KNR-ip Arnaq Knudsen-Frederiksenimut tunngatillugu nakorsap nalunaarsugai oktobarip 28-anili takuniarsarilerpai, tamannali suli periarfissaanngilaq. Tamanna Paamiuni napparsimmavimmi nakorsap nalunaarsugai tigumminninnginneranik pissuteqarpoq, taamaattumik Arnaq Knudsen-Frederiksenip suli pissarsiarinngilai.

Peqqinnissaqarfiup aqutsisuinut oqaluttuat saqqummiupparput, soorlu nakorsap nalunaarsugai pissarsiarineqarsinnaannginnersut kiisalu Peqqinnissaqarnermi aqutsisut Arnaq Knudsen-Frederiksen arnat arlallit akuersissuteqaratik spiralilerneqarsimasut akornanniinnera qanoq isumaqarfigineraat apeqqutigaarput.

Peqqinnissaqarnermi aqutsisut allakkatigut ima akissuteqarput:

- Suliat oqaluttuarisaanermi pisimasut pineqarput, taakku Nakorsaaneqarfiup, Peqqinnissamut Naalakkersuisoqarfiup ilisimatusartullu eqimattat danskit kalaallillu naalakkersuisuinit pilersinneqartut misissugassaraat. Tassunga atatillugu Nakorsaaneqarfiup Peqqinnissaqarfiullu akornanni arnat nalunaarsukkanik pissarsinissaannut ajornaannerulersitsinissaq pillugu suleqatigiittoqarpoq.

- Misissuineq suli ingerlavoq, taamaammat Peqqinnissaqarfik allamik oqaaseqarsinnaanngilaq.