Vittus akerliugami naalakkersuisuujunnaartoq

Naalakkersuisoq Vittus Qujaukitsoq politikkimi suliaqartuni ataasinngornermi ullaakkut aalassatsitsingaatsiarpoq, tassami nammineq Facebookimi allakkami, ataasinngorneq tassaasoq ulloq Naalakkersuisutut suliffia kingulleq. Sooq taama aalajangernerluni, ataasinngornermi ullup qeqqanut nassuiaatigaa.

Naalakkersuisut Siulittaasuata Kim Kielsenip kissaatigaa, Vittus Qujaukitsoq, nunanut allanut tunngasunut naalakkersuisuujunnaassasoq, Qujaukitsulli tamanna akueriumanngilaa:

- Tamanna nalilerpara akisussaaffimmik iluatsinnissaanut ilungersuutigisimasannik arsaarsinerusoq. Pisullu ima nalilerpakka, naalakkersuisuniikkunnaassallunga, KNR-imut taama oqarpoq.

Vittus Qujaukitsup ilanngullugu oqaluttuaraa, naalagaaffeqatigiinneq illersornissamullu politikki pillugu, Kielsenilu aamma isumaqatigiissimanatik.

- Ima nalilertariaqarpara Naalakkersuisut Siulittaasuallu naammaginartumik isumaqatigiissimannginnatta.

Siumullu siulittaasuat, Kielsen partiimi siulittaasunngorniunnissamut piareersalereertariaqarpoq. Vittus Qujaukitsormi siulittaasunngorniarnissamut maanna piareersimavoq.

- Politikki unitsilinngilara. Suliaqarnera ingerlatiinnassavara, aamma naatsorsuutigilluinnarpara Siumup aasamut ataatsimeersuarneranut piukkunneqarlunga.

Vittus Qujaukitsoq USA Danmarkilu pillugit arlaleriarluni ersarilluinnartumik isummertarsimavoq. Danmarkimi Kalaallit Nunaannilu decembarimi uissuummisitsingaatsiarpoq, tassami nunanut allanut tunngasunut naalakkersuisutut, Kalaallit Nunaata kissaatai soqutigineqanngippata Kalaallit Nunaat Naalagaaffeqatigiinniit ilaajunnaassasoq USA-lu Pituffimmiit anissasoq siorasaaringami.

AAMMA ATUARUK Danmarkip anneruniarnera aserorsaataalluinnarpoq

Taama nalunaarneq Danmarkimit Naalakkersuisuniillu tigulluarneqanngilaq.

Tamanna pillugu uani atuaqqigit.