Vittus: Danmarkip anneruniarnera aserorsaataalluinnarpoq

Naalakkersuisut Danmarkimik pakatsissuteqarnerat nunatta kunngeqarfimmit anineranik kinguneqaratarsinnaavoq.
Assi © : Pernille Ingebrigtsen/Arctic Frontiers 2016
Allattoq Ritzau
decembarip 13-at 2016 04:10
Nutserisoq Simon Uldum -

Nunatta nammineerluni aalajangiisinnaassuseqarnerunissamik kissaateqarnera Danmarkimit isiginngitsuusaarneqarnerarlugu Naalakkersuisut sakkortuumik isornartorsiuipput.

Taamatullu pakatsissuteqarneq Nunatta kunngeqarfimmit anineranik kinguneqaratarsinnaavoq.

Nunanut allanut naalakkersuisoq Vittus Qujaukitsoq aviisimi Politikenimi apersorneqarluni taama oqarpoq.

- Anneruniarneq naalagaaffeqatigiinni atassuteqarnitsinnut aserorsaataalluinnarpoq, aviisimut taama oqarpoq.

Amerikamiut nunatsinni sakkutooqarfiliornissaannik Danmarkip USA-llu isumaqatigiissutaat siulleq "ukiuni 75-ini pakatsisimanermik qanoq-iliorsinnaannginnermillu" kinguneqarsimasoq, Qujaukitsup oqaatigaa.

Nunarput sakkutooqarfigineqarnerminut, asuli "perulluliuutaaginnartunut mingutsitsisunullu" taartisiassaqartinneqanngitsoorpoq, nunanut allanut naalakkersuisoq Politikenimut taama oqarpoq.

Aamma atuaruk Alloriarnerit siulliit pingaaruteqartussat amigaataapput

Danmarkili sunniuteqarnerulerlunilu Natomut ilaasortaanerminut akikillisaavigineqarsimavoq, naalakkersuisoq taama unnerluussuteqarpoq.

Tamatumunnga peqatigitillugu Nunatsinni inuussutissarsiuummut pingaarnermut,  aalisarnermut, tunngatillugu Nunarput oqaasissaqartitaanngilaq.

Nunattami nunani tamalaani suliniaqatigiiffinnut, soorlu Nafomut NEAFC-mullu, Atlantikup avannaani aalisarnermut malittarisassiorfiusunut ilaasortanngornissaa Danmarkip akueriumanngilaa, Qujaukitsoq isumaqarpoq.

Namminiilivinnissamut naalakkersuisoqarfik oktobarip qaammataani pilersinneqarpoq.

Inatsisartullu isumaqatigiissut qaammat ataaseq qaangiummat nalunaarummik akuersissuteqarput, tassanilu USA-p Danmarkillu akornanni illersornissamik isumaqatigiissutip isumaqatigiinniutigeqqinneqarnissaa piumasarineqarpoq, Pituffimmi sakkutooqarfeqartitsinerup Nunatsinnit pissarsiaqarfiunerunissaa siunertaralugu.

Danskit Nunatsinnilu naalakkersuisut saammaateqatigiinniarlutik ataatsimiittarneri iluaqutaasimanngillat, Vittus Qujaukitsullu Natop generalsekretæria Jens Stoltenberg decembarip aallaqqaataani kisimiillu ataatsimeeqatigaa illersornissarlu pillugu nutaamik isumaqatigiissuteqarnissamik piumasaqaateqarneq nassuiaatigalugu.

Aamma atuaruk Ilisimatooq Namminiilivinnissamik kissaateqarneq Danmarkip tapersersornerusariaqarpaa

Vittus Qujaukitsup apersorneqarnera Politikenip ministeriunermut Lars Løkke Rasmussenimut (V) naalagaaffeqatigiinnermut aamma ministeriusumut saqqummiuppaa, taannali oqaaseqarumanngilaq.

Danskilli nunanut allanut tunngasunut ministeriat Anders Samuelsen (LA) oqaaseqarumavoq:

 - Isumaqarpunga taamatut isornartorsiuineq tulluanngitsoq sunniuteqarluanngitsorlu, Politikenimut e-malikkut taama allappoq.

- Vittus Qujaukitsup anneruniartoqarneranik oqarnera ilisarisinnaanngilara. Naalakkersuisut toqqammavissaanni erseqqilluinnartumik oqaatigaarput Pituffimmi sakkutooqarfimmut Camp Centurymullu tunngatillugu suliassat pingaarutillit isumaginissaannut Namminersorlutik Oqartussat suleqatigineqarnissaat danskit naalakkersuisuisa pingaartilluinnaraat. Aaqqiissutissanillu nassaarniarnissaq siunertaralugu qanittumik kinguneqartussamillu suleqatigiinnerput ingerlatiinnassavarput.

/ritzau/