Ilisimatooq Namminiilivinnissamik kissaateqarneq Danmarkip tapersersornerusariaqarpaa
Danskeq ilisimatooq nunatsinnut tunngasumi atuakkiamini nutaami - National Identity Politics and Postcolonial Sovereignty Games, Greenland, Denmark, and the European Union - taama inerniliivoq.
- Kalaallit Nunaata namminiilivinnissaa anguniagaasoq ataatsimoorussaasoq, nutaatut paaseqatigiissutinngorsinnaagaluarpoq, Aalborgip universitetiani issittumi inooriatsit ineriartornerat pillugit ilisimatusarfimmi ilinniartitsisoq Ulrik Pram Gad oqarpoq.
Aamma atuaruk Namminiilernissamik kissaateqarneq Lars Løkkep ataqqivaa
Taassuma Nunatta Danmarkillu akornanni pissutsit ukiuni qulinit amerlanerusuni ilisimatusarfigai, taamanilu namminersorluni oqartussani nunanut allanut tunngasunik pisortaqarfimmi sulisimalluni.
Naalagaaffiup Danmarkip danskillu politikeriisa Kalaallit Nunaata namminiilivinnissamik kissaateqarnera akuersaarnerullugulu tapersersornerussagaat pisariaqartoq, Nunatta Danmarkillu akornanni pissutsinut tunngasuni atuakkamini nutaani Ulrik Pram Gadip inerniliuppaa.
Aamma atuaruk Tunngaviusumik inatsiseqalernissamut atatillugu oqaatsit assortuussutigigaat
- Namminiilivikkusunnermik isuma piginneqataaffigisuttut pissuseqarfigilerlugu suleqatigiissutigigutsigu, ilimagaara naalagaaffeqatigiinneq pisariaqassuseqarnerulissasoq, Kalaallit Nunaata namminersortuunnginnera tunngaviatigut utaqqiisaarutaannasuusutut Danmarkip akuersaassammagu, Pram nassuiaavoq.
Ulrik Pram Gadilu naapertorlugu namminersorneq eqqunneqarmalli danskit politikeriisa Nunatsinnik eqqartuisarnerat ajunnginnerungaatsialersimavoq, danskilli nunanut allanut politikkissaa pillugu Taksøep nalunaarusiaa namminiilivinnissap ataatsimorussaanerata kinguariaallaatigaa.
Aamma atuaruk Espersen Nunatta aningaasaqarneranik isornartorsiuisoq
- Issittumi pissaanilissuartut eqqartuineq aallartinneqarniariartoq, Danmarki kunngeqarfik eqqartorneqalertarpoq, taava Kalaallit Nunaat nammineq soqutigisaliusoq namminiilivinnissamilluunniit kissaateqartuusoq eqqarsaatigisariaaruttarpoq, Ulrik Pram Gad oqarpoq nangillunilu:
- Taamalu kissaateqarnermik akuersinissaq Danmarkimi naalagaaffiup amigaatigaa. Tamannalu Naalagaaffeqatigiinnerliuleriasaannginnissamut aaallaaviusoq nalilerpara.
Aamma atuaruk Vittus: Taksøep nalunaarusiaa annilaarnarpoq
Kalaallit politikeriisa namminiilivinnissap qanoq ittuunissaa aamma nassuiarluarnerusinnaasariaqarpaat.
- Namminiilivinnerup qanoq aaqqissuussaanissaa kissaatigiineritsik, taavalu namminersulivissimalernermi Danmarkimut attaveqarnerup qanoq ittuunissaanik kissaateqarnerlutik , Ulrik Pram Gad oqarpoq.
Aamma atuaruk Savalimmiut nunanut allanut tunngasumik namminneq nalunaarusiorusupput