Namminiilernissamik kissaateqarneq Lars Løkkep ataqqivaa
Nutaarsiassaqartitsiviup Ritzaup allaaserisaa naapertorlugu danskit ministeriunerata erseqqisaatigaa, Kalaallit Nunaata Savalimmiullu namminersulernissamik kissaateqarnerat ataqqillugu.
- Kalaallit Nunaata Savalimmiullu namminneq aalajangissavaat namminerisamik tunngaviusumik inatsiseqarlutik suliniarnerlutik, Lars Løkke Rasmussen naalagaaffeqatigiinni siuttut ataatsimiinnerisa kingorna taama oqarpoq
Savalimmiuni naalakkersuisut siulittaasuata Aksel V Johannesenip aamma Naalakkersuisut siulittaasuata Kim Kielsenip Savalimmiut Kalaallit Nunaallu namminerisamik tunngaviusumik inatsiseqalernissaq, aningaasarsiornerlu ataatsimiinermi pingaarnertut oqaluuseraat.
- Isumaqarpunga naalagaaffeqatigiinnerput nukittunerulersitsisoq tamannalu ullumi ataatsiminnermi uppernasivara. Savalimmiut aamma Kalaallit Nunaata namminerisamik tunngaviusumik inatsiseqalernissamik kissaateqarnerat ataqqivara, ministeriuneq taama oqarpoq, nangillunilu:
- Nunat taakku marluk qanoq iliorniarnerlutik nammineq aalajangissavaat.
Apeqqut taanna pillugu danskit naalakkersuisuisa savalimmiunik kalaallit nunaannillu oqaloqateqarnissamut ammapput, namminerisamik inatsimmik suliaqarnermi apeqqutinik takkuttoqassagaluarpat, tamannalu naalakkersuisut tunngavianni atuarneqarsinnaavoq, Lars Løkke Rasmussen oqarpoq.
