Norskit nunanut allanut unammisartuini Ukaleq sungiusaqataarngaarpoq
Sisoraaserlutik ooqattaasartartut kattuffiat Grønlands Biathlon forbund aamma norskit sisoraaserlutik ooqattaasartartut kattuffiat upernaaq isumaqatigiissuteqarput Ukaleq Slettemark norskit inuusuttuni nunanut allanut unammisartuini U-23-ni sungiusaqataasinnaalissasoq.
AAMMA ATUARUK Sisoraaserluni ooqattaasarneq: Ukaleq norskit nunanut allanut unammisartuini sungiusaqataalerpoq
Tillerneq aamma qaffasilluarpoq norskit nivissat peqatigalugit qanittumi Lampelandimi sungiusaqataanermi. Sukkatsisarnerit arpalluni assakaasulinnillu sisoraasersornikkut pisut saniatigut ooqattaasarneq mininneqanngilaq.
- Sakkortuumik pimoorussiffiusumillu ullut tamarmik ingerlanerat assut nuannaraara. Iligiit akornanni eqqarsartaatsikkut qaffasissumik aamma inissisimasoqarpoq, aamma tamatta kakkassutsikkut inissisimaffipput eqqarsaatigalugu tamatta iluaqutigaarput, Ukaleq Slettemark oqarpoq.
- Sungiusarnermi immitsinnut unammillertarpugut aammalu peqataasut nukittuffii tamatta ilikkagaqarfigisinnaallugit. Ukiussamut qilanaaqaanga. Tassanimi takusinnaalerumaarparput ukiussamut piuareersaatit tulluartuusimanersut, Ukaleq Slettemark oqarpoq.
Pitsanngoriarfissaqarpoq
Ukioq 2019 aallartilaartoq inuusuttuni nunarsuarmi pissartanngorpoq aammalu unamminerni allani aalaakkaasumik angusarissaarluartarnermigut norskit nunanut allanut unammisartuinut sungiusaqataasinnaalerpoq.
AAMMA ATUARUK Ukaleq Slettemark OL-imut legatinnattoq: Isumalerujussuuvoq
Ukaleq Slettemarkip norskit nunanut allanut unammisartuini sungiusaqataasalernermini maannamut sungiusimariikkaminit suli sakkortunerusumik angummanniarfeqalerpoq.
- Periutsini tamani teknik pitsanngorsartariaqarpara pingaartumilli qummukajaakkoornermi annertuumik pitsanngoriartitaqarpunga. Ooqattaasarnermi pitsannguumisarlungalu apparialaartarpunga. Ataatsimulli isigalugu sukkanerulertariaqarpunga tamannalu angusinnaavara tunngaviusumik piginnaanerit sungiusarluarnerisigut, Ukaleq Slettemark oqarpoq.
AAMMA ATUARUK Ukaleq Slettemark nersorneqartoq
Coronamik nunarsuarmi nappaalanerup kingunerisaanik timersornikkut aaqqissuussat nunarsuaq tamakkerlugu akornuserneqarpoq. Sisoraaserluni ooqattaasarnermi unammisaqattaarnerit aallarteqqinnissaat taamaattumik suli nalorninartoqarpoq.
