Nunarsuarmi pissartaq Ukaleq Slettemark nersorneqartoq
Kalaallini siullersaallunni nunarsuarmi pissartanngortoq Kommuneqarfik Sermersuumit pingasunngornermi nersorneqarpoq. Inuusuttup nunarsuarmi pissartaasup nersorniarneqarnerani ilaqutaasut, aningaasaliisut, tassa ilaatigut Elite Sport Greenland, Kalaallit Nunaanni Timersoqatigiit Kattuffiat Polar Seafoodilu, najuupput.
Immikkut piginnaasalik
Sisoraaserluni ooqattaasartoq, Ukaleq Slettemark, Slovakiami nunarsuarmi januaarimi ukioq manna pissartanngorpoq.
AAMMA ATUARUK Ukaleq Slettemark: Nunarsuarmi pissartanngorluni misigisaq tupinnaqaaq
- Ullut tamaasaanngilaq kalaallit nunarsuarmi pissartanngortarnerat. Taamaattumik pingaartissimavarput pikkorissorsuup Ukaleq Slettemarkip angusai pillugit nersornissaa, Kommuneqarfik Sermersuumi borgmesteri, Charlotte Ludvigsen, oqarpoq.
Ukaleq Slettemark 10 kilometeritut isorartutigisumi, sukkaqaluni, taamani ingerlaaqataavoq. Nakersimaqaarlu, katillugimmi 20-riarluni ooqattaarinermi ataasinnguarluunniit uniunngilaa.
Borgmesterip oqalugiaammini Ukaleq Slettemark immikkut piginnaasalittut taavaa. Slettemarkillu sapiissuseqarnermigut nunatta inuusuttaanik maligassiuisuunerarlugu.
Nunarsuarmi pissartanngortup nersugaanini nuannaarutigaa. Neriuutigaalu tamanna nunatsinni timersornerup ineriartortinneqarneranik malitseqarumaartoq.
- Timersornerup ineriartortinneqarnissaa taavalu sisoraaserluni ooqattaasarnermut soqutiginnilersitsinissaa neriuutigaara, nunarsuarmi pissartaq Ukaleq Slettemark oqarpoq:
- Qanoq takutitsilluartiginera nammineq nalunngittuaannarpara nammineerlungami sukataarutigivara. Malunnartinneqarnerali qaavatigut nukissanitsitsivoq.
Kalaallit Nunaanni Timersoqatigiit Kattuffianni pisortaajunnaartoq, Carsten Olsen, Elitesport Greenland Ukaleq Slettemarkip sungiusaasua arnaalu, Uiloq Slettemark, aamma oqalugiarput.
AAMMA ATUARUK Tulluusimaarutigeqaara
AAMMA ATUARUK Ukaleq Slettemark nunarsuarmi pissartanngorpoq
Anaanaasup Uiloq Slettemarkip oqaatigaa nunatsinni sisoraaserluni oqattaasartuuneq ilungersunartuusoq, tassami sungiusartarfeqanngilaq. Panimilu nunarsuarmi pissartanngornera taamaalilluni annertuumik angusaqarfiuvoq.
Tamaviaarniarpoq
Nunarsuarmi pissartanngortoq aasaanerani timersorallassanngilaq. Kisianni tuttunniaqataaniarpoq. Aggusti qiteqqutereerpat Norgemi ilinniarnertuunngorniarfimmi 3.G-mi atualissaaq sungiusaqqilerlunilu.
Nunarsuarmimi pissartaareeraluarluni nutaanik angusaqarusuppoq.
- Pisarnertut tamaviaassaanga. Junior Cupimi peqataaleruma aamma tamaviaassaanga Senior Cupimilu peqataaleruma naammassisinnaasakka naammassiniarsarissavakka, Sisoraaserluni ooqattaasartoq, Ukaleq Slettemark, oqarpoq.
