Ukaleq Slettemark, qaninnertut nikorfasoq, siunissani norskit U-23-ni nunanut allanut unammisartuini sungiusaqataasassaaq

Sisoraaserluni ooqattaasarneq: Ukaleq norskit nunanut allanut unammisartuini sungiusaqataalerpoq

Nunatsinni sisoraaserlutik ooqattaasartartut kattuffiat Grønlands Biathlon Forbund aamma norskit ooqattaasartartut kattuffiat suleqatigiinnissamik isumaqatigiissuteqarnerisigut nunat tamalaat unamminerini Ukaleq Slettemark pikkorilluinnartunik ikiorteqartalissaaq

Ukaleq Slettemark Nuummeersoq sisoraaserluni ooqattaasarnermi norskit U-23-ni nunanut allanut unammisartuinik sungiusaqateqarnissamut aammaanneqarpoq. Nammineq sungiusaasorilissavaa Norgemi nuna tamakkerlugu sungiusaasoq Halvor Jørstad. Elite Sport Greenland aamma Grønlands Biathlon Forbund sisamanngornermi ullaap tungaa taama nalunaarput.

AAMMA ATUARUK Ukaleq Slettemark får OL-legat: - Det er en stor anerkendelse  

Ukaleq Slettemarkip pikkorilluinnartuunera Norgemi nunanilu tamalaani angusat allattorsimaffianni takuneqarsinnaavoq. 2019-mi inuusuttuaqqani nunarsuarmi pissartanngorpoq aammalu Norgemi nunanilu allani angusarissaartarluni. Nunat tamalaat kattuffissuata IBUp unammisitsinerani inersimasuni unammeqataanermini aamma pikkorinnerit qulit akornannut inissippoq. Maannalu tassa nunani tamalaani unamminerni pikkorilluinnartunik ikiorteqarsinnaalissaaq aamma IBUp unammersuartitsisarnerini.

AAMMA ATUARUK Ukaleq Slettemark napparsimanini pissutigalugu inuusuttuni pissartanngorniuteqataanngitsoq

- Unammisaqattaarnerit nalaanni Norgep nunanut allanut unammisartuinut IBU-cupinut, inuusuttuaqqat VM-qarneranni EM-qarnerannilu angalaqataasassaaq norskit sullissisartui tamakkiisumik ikiortigisinnaallugit, Elite Sport Greenland aamma Grønlands Biathlon Forbund nalunaarput.

Nunarsuarmi kakkannerit akornanni

Sisoraaserluni ooqattaasarnermi nunat tamalaat kattuffiat IBU ikiorsiullugu Grønlands Biathlon Forbund suleqatigiinnissamik isumaqatigiissut pillugu isumaqatigiinniarpoq. Suleqatigiinneq aqqutigalugu Ukaleq Slettemark kakkareeraluaqaluni suli kakkannerulernissamik periarfissinneqassaaq.

- Sungiusartartoqatigiit piginnaasallu Ukalip peqataaffigisinnaaligai Norgemi ooqattaasartartut kattuffiatigut pilersut nunarsuarmi qaffasinnerpaat ilagaat. Ukaleq ineriartornissamik angusaqarnerulernissamillu pissarsisinnaassanngikkaluarpoq nuna angisooq piginnaasaqarluartorlu suleqatigitinnagu, Elite Sport Greenland aamma Grønlands Biathlon Forbund nalunaarput.

Ukaleq Slettemark Geilomiit nuuttussanngorpoq tassanilu timersortartut kakkannersiukkat ilinniarnertuunngorniarfianni atuartuuvoq. Lillehammerimi norskit nunanut allanut unamisartuisa katersuusimaffigisaanni najugaqalissaaq. Ukaleq Slettemarkip anguniagaqarluni pimoorussilluni sungiusarnera isumaqatigiissummut aqqutissiuusseqataavoq.

- Ukaleq ersarissumik anguniagaqartuuvoq aammalu qamuuna nukittussuseqarpoq inerisartuarluni pikkorissiartornissaminut. Taamaattumik isumaqatigiissut manna aqqutigalugu sisoraaserluni ooqattaasarnermi nunarsuarmi kakkannerpaat akornanni Ukalip angusaqarfia piviusunngormat assorsuaq nuannaarutigaarput, Elite Sport Greenlandimi siulersuisut siulittaasuat Nikolaj Christoffersen oqarpoq.

Norskit nunanut allanut unammisartuisa isumaqatigiissut aamma naammagisimaarpaat unammisartut norskit unammisartuisa pikkorinnersaannut nallersuussinnaasoq sungiusaqatigisalissagamikku.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat