Ukaleq Slettemark napparsimanini pissutigalugu inuusuttuni pissartanngorniuteqataanngitsoq
Inuusuttoq sisoraaserluni ooqattaasartoq, Ukaleq Slettemark qaammat ataaseq napparsimareerluni inuusuttut januaarip naanerani nunarsuarmi pissartanngorniuunnissaannut peqataasinnaanissaminik neriuuteqarluni unammiartorpoq.
Nunarsuarmili pissartanngorniuuffiusussamut, Schweizimukariartornermi peqqissivissimanini paasivaa, Kalaallit Nunaanni Biathlonertartut Kattuffiat paasissutissiivoq.
Nunarsuarmi pissartanngorniuunneq Ukaleq Slettemarkip inuusuttut akornanni unammiffigisinnaasaani kingulliuvoq. Taassuma siorna 1-iuffigisani, 4-figisani 6-iuffigisanilu illersortussaagaluarpai.
AAMMA ATUARUK Ukaleq Slettemark inuusuttut nunarsuarmi pissartanngorniunneranni peqataalersoq
Sisorartartoq tusaamasaq suli sungiusaleqqinngitsoq
- Ukaleq suli peqqissivinngilaq sulilu sungiusaleqqinnani. Taamaammat marsiutinnagu unammeqataaqqinnissaa naatsorsuutigineqanngilaq. Unamminissat immaqa naammassipput, kattuffik allappoq.
Inuusuttup sisoraaserluni ooqattaasartup pissartanngoqqinnissaa ilimagivallaarneqassanngitsoq, sisorartartup Schweizimut aallannginnerani sisoraaserluni ooqattaasartup arnaa, Uiloq Slettemark allappoq.
- Qaammat ataaseq napparsimareerluni Ukaleq pitsanngoriartorpoq, imalu pitsanngortigaaq sungiusaqqissinnaalerluni. Inuusuttulli nunarsuarmi pissartanngorniunnissaannut immaqa kingusinaalaarpoq, Uiloq Slettemark Facebookikkut allappoq.