Ukaleq Slettemark OL-imut legatinnattoq: Isumalerujussuuvoq
Sisoraaserluni ooqattaasartartoq Ukaleq Slettemark OL-imut legatinnappoq.
Danmarkimi Sisorartartut Kattuffiat nittartakkamini allappoq.
Legatit timersortartunut timersuutinik eqaarsarnerunnginnerusutut taaneqartartunut tunniunneqartarput. Taamaammat sisorartartunut OL-imi peqataanissamik anguniagaqarusuttunut tapersiissuteqarnissaq periarfissaavoq.
Ukaleq Slettemarkilu matumani tapiiffigineqarpoq.
- Isumalerujussuuvoq tulluusimaarnaqalunilu. Timersuutima ingerlalluarnissaanut tamanna isumaqarpoq. Ulluinnannut oqilisaataasorujussuussaaq, Ukaleq Slettemark oqarpoq.
AAMMA ATUARUK Ukaleq Slettemark Slovenienimi normu 6-inngorpoq
Sisorartartut klubbiannit Hareskovimit Ida Brøns tassanilu klubbimit Casper Dyrbye kiisalu Hobromi sisorartartunit Marcus Vorre aamma legatinnapput.
Timersortartut legatinnattut tamarmik ”OL-imi ajugaaniunnermi anngunnissamut periarfissagissaartutut, ilungersortutut, pingaartitsillutik iliuuseqartutut angusarissaarluartussatut aamma Danmarks Skiforbundimut Danmarks Idrætsforbundimullu illorrisimaartitsisussatut nalilerneqarput”, sisorartartut kattuffiat legatimik tunisinermut atatillugu paasissutissiivoq.
Nunat tamalaat olympiademut ataatsimiititaliaata suleqatigineratigut legatimik tunisisoqarpoq.
Legatimi qanoq aningaasartaqartigineqarsoq suli paasissutissiissutigineqanngilaq.