Niuernermik ilinnialertussaagaluit ilinniakkamik kiisami aallartitsisinnaanngulersut
Ilinniakkamik aallartitsinissamut akuerisaareeraanni ilinniakkamillu ulloq aallartitsiffiusussaq nalunaarutigineqareeraangat pisut minnerunngitsumillu siunissaq toqqissisimanarnerusarput. Niuernermik Ilinniarfimmili bachelorinngorniarlutik septembarimi aallartittussaagaluit nalaassinerlupput.
Ilinniakkammi naalakkersuisunit akuerineqaratillu aningaasanik immikkoortitsivigineqarsimanngimmata aallartissinnaasimanngillat. Tamannali maanna aaqqiivigineqarpoq.
- Ilinniakkat taakku kiisami akuerineqarput, aappaagulu februaarimi aallartittussanngorlutik, Ilinniartitaanermut, Kultureqarnermut Ilageeqarnermullu Naalakkersuisoq, Ane Lone Bagger, KNR-imut oqarpoq.
Tassami nunani tamalaani niuerneq aamma niuernermi tuniniaaneq pillugit bachelorinngorniarluni ilinniakkanut aningaasaliissutit 2020-mi aningaasanut inatsimmut sapaatip-akunnerani kingullermi akuerisamut ilannguneqarput.
Akisussaatitaanissaq aaqqiagiinngissutigigaat
Ilinniakkamik aallartitsisussaagaluit eqqugaanerannik kinguneqartumik ilinniakkat aallartinnissaannut sapaatip-akunnera ataasiinnanngortoq taamaatinneqareersullu Niuernermik Ilinniarfik Naalakkersuisullu pisumut akisussaatitaanissaq aaqqiagiinngissutigilerpaat. Ilinniakkamik aallartitsisussaagaluit arlallit suliffimminnit soraarsimallutillu ilinniakkamik allamik aallartitsinissaminnut neqeroorfigineqaramik qujaannarsimapput.
Ilinniakkalli ingerlannissaannut pilersaarutit maanna akuerineqarsimalerlutillu aningaasanik immikkoortitsiffigineqarput - tamannalu ilinniakkamik aallartitsisussaagaluit aqqaneq-marluusut periarfissinneqaqqinnerannik kinguneqarpoq.
AAMMA ATUARUK Ilinniartut aqqaneq marluk pakatsingaatsiartut: Ilinniarfissaat nutaat taamaatiinnarneqartut
Ilinniakkamik septembarimi aallartitsisussaagaluit aqqaneq-marluusut ilinniakkamik aallartitsinissaminnut akuerineqareersut, Niuernermik Ilinniarfimmi Nuummiittumi siulersuisut siulittaasuat Karsten Lyberth-Klausen erseqqissaavoq.
- Tassa imaappoq, ilinniakkamik februaarip aallartinnerani aallartitsinissaminnut neqeroorfigineqassapput, Karsten Lyberth-Klausen oqarpoq.
Ilinniakkanik pineqartunik aallartitserusuttunut suli inissaqartitsivugut
Bachelorinngorniarluni ilinniakkanik pineqartunik aallartitsinissaminnut akuerisaareersut saniasigut ilinniakkanik taakkuninnga aallartitserusuttut allat periarfissaqarput.
- Qinnuteqarnissamut periarfisseqqiittoqassaaq, tamannalu sapaatip-akunnerata tulliata qiteqqunnerani pissasoq ilimagaarput, ullorlu qinnuteqarfissaq decembarip ulluisa 20-nnut killeqassaaq, qinnuteqartullu tamatuma kingorna piaarnerpaamik akissutisissapput, Karsten Lyberth-Klausen oqarpoq.
AAMMA ATUARUK Alexander ilinniarluni aallartittussaagaluarpoq: Pakatseqaanga
Bachelorinngorniarluni ilinniakkanik pineqartunik marluusunik aallartitserusuttunut 20-nut inissaqartitsisinnaassallutik, Karsten Lyberth-Klausenip oqaatigaa.