Alexander ilinniarluni aallartittussaagaluarpoq: Pakatseqaanga
- Pakatseqaanga, piareersarnikuugaluarama atualernissannut. Suliffinniit soraarumanikuuvunga.
Alexander Dahl Nunat tamat akornanni niuernermik bachelorinngorniarfimmi ataasinngorpat ilinnialertussaagaluartoq taama oqarpoq.
Ilinniagarli aallartinngiinnalermat 25-nik ukiulik ilinnianngitsuulerpoq. Alexander Dahlimmi ilinniarfissaralua tassa Nunat tamat akornanni niuernermik bachelorinngorniarfik ilinniakkallu aappaa tassa Aningaasaqarnermik nukissatigullu sillimmatinik aqutsinermik bachelorinngorniarfik ilinniakkat aallartinnissaannut ullut arfinillit sioqqullugit taamaatiinnarneqarput.
Ilinniakkat marluk Nuummi Niuernermik Ilinniarfimmit neqeroorutigineqarput. Ilinniakkalli ”aallartinnissaannut atortussatigut aningaasaliissutitigulluunniit akuerisaasunik tungavissaqanngitsut”, Ilinniartitaanermut, Kultureqarnermut Ilageeqarnermullu Naalakkersuisoqarfiup tusagassiuutinut nalunaarutaani allassimavoq.
Taamaammat ilinniarfik ilinniakkanik neqerooruteqarnissamut maannakkorpiaq inatsisitigut akuerisaasumik tunngavissaqanngilaq, taakkununngalu aningaasaliisoqarani, tamanna naalakkersuisoqarfiup tusagassiuutinut nalunaarutaanni allassimavoq.
Sussanerluni nalugaa
Nunatsinni Niuernermik Ilinniarfimmi Nuummiittumi forstanderip, Christel Lund Bøjlerip pisoq aamma uissuummissutigaa. Ilinniarfik ippassaq paasitinneqartoq ilinniarfiillu aallartinneqarsinnaannginnerat ilisimatitsissutigineqarnikuunngitsoq, forstanderip oqaatigaa.
- Ilinniarfiup naalakkersuisoqarfik ilinniakkanik marlunnik aallartitsinissamut 2017-imi novembarimili qanimut suleqatigaa – naalakkersuisoqarfiullu ilinniakkat aningaasaliiffigineqarnissaat aningaasanut inatsimmi inissinneqarsimannginnerarlugit ilinniarfik ilisimatitsissutiginikuunngilaa, Christel Lund Bøjler KNR-imut akissuteqarluni allappoq.
- Illuatungaanili siulersuisut naalakkersuisoqarfik aningnaasaliisoqarnissaa pillugu ukiuni marlunni kingullerni qanimut oqaloqatigiissuteqarfigisarpaa, taamaammat qulakkeerneqarsimannginnera uissuumminarpoq, forstanderi allappoq.
AAMMA ATUARUK Ilinniartut aqqaneq marluk pakatsingaatsiartut: Ilinniarfissaat nutaat taamaatiinnarneqartut
Alexander Dahlip ataasinngorpat ilinniakkamik nutaamik ilinnialertussaagaluartup sulerissanrluni maanna naluaa.
- Pakatseqaanga, piareersarnikuugaluarama atualernissannut. Suliffinniit soraarumanikuuvunga. Atuarfissaraluaralu alla unitsinnikuullugu, Alexander Dahl oqarpoq.
- Nalugallarpara sussanerlunga.
- Atuarfissaraluara aappaa aallartereernikuugami. Kingusinaareerama aallartereeramik naameereerakku. Qangalili bekræftertussaagami aallartikkusunnersunga. Taava naameernikuugakku, Alexander Dahl oqarpoq.
Ilinniarfiup siulersuisuisa susoqarsimanera qulaajarniarlugu ilinniarfiillu piaarnerpaamik aallartinnissaat qulakkeerniarlugu Ilinniartitaanermut Naalakkersuisumut, Ane Lone Baggerimut manna saaffiginnissuteqarput.
Ilinniarfinni marlunni katillugit aqqaneq marluk tassa ilinniakkami ataatsimi arfinillit ilinnialertussaagaluarput.