Ilinniartut aqqaneq marluk pakatsingaatsiartut: Ilinniarfissaat nutaat taamaatiinnarneqartut
Ilinniartut aqqaneq marluk bachelorinngorniarfinni nutaani marlunni ataasinngormat aallartittussaagaluartut pakatsingaatsiarput.
Ilinniarfiit nutaat marluk Niuernermik Ilinniarfimmit Nuummiittumik neqeroorutigineqartut allartinnavianngillat. Ilinniartitaanermut, Kultureqarnermut Ilageeqarnermullu Naalakkersuisoqarfik taama paasissutissiivoq.
Ilinniarfiit marluk tassaapput Nunat tamat akornanni niuernermik bachelorinngorniarfik aamma Aningaasaqarnermik nukissatigullu sillimmatinik aqutsinermik bachelorinngorniarfik.
Matumani ”ilinniakkat aallartinnissaannut atortussatigut aningaasaliissutitigulluunniit akuerisaasunik tungavissaqannginnerat” pissutaasoq, Ilinniartitaanermut, Kultureqarnermut Ilageeqarnermullu Naalakkersuisoqarfiup tusagassiuutinut nalunaarutaani allassimavoq.
Taamaammat ilinniarfik ilinniakkanik neqerooruteqarnissamut maannakkorpiaq inatsisitigut akuerisaasumik tunngavissaqanngilaq, taakkununngalu aningaasaliisoqarani.
- Pisimasoq ilungersunarluinnartutut isigivara, ilinniartitaanermut naalakkersuisoq Ane Lone Bagger oqarpoq.
Tassami ilinniagaqarniartut ilinniarlutik aallartinnissaminnik takorluuisimagaluartut akunnattoortinneqarput. Ilinniakkat neqeroorutiginissaannik suliaqarnermi kukkusoqarsimavoq. Pineqartup iluani inatsisit maleruarnagit pisortat ilinniarfiutaat ilinniakkanik neqeroortussaanngilluinnaraluarpoq,
Niuernermik ilinniarfimmi uissuummisut
Nunatsinni Niuernermik Ilinniarfimmi Nuummiittumi forstanderip, Christel Lund Bøjlerip pisoq aamma uissuummissutigaa. Ilinniarfik ippassaq paasitinneqartoq ilinniarfiillu aallartinneqarsinnaannginnerat ilisimatitsissutigineqarnikuunngitsoq, forstanderip oqaatigaa.
- Ilinniarfiup naalakkersuisoqarfik ilinniakkanik marlunnik aallartitsinissamut 2017-imi novembarimili qanimut suleqatigaa – naalakkersuisoqarfiullu ilinniakkat aningaasaliiffigineqarnissaat aningaasanut inatsimmi inissinneqarsimannginnerarlugit ilinniarfik ilisimatitsissutiginikuunngilaa, Christel Lund Bøjler oqarpoq.
- Illuatungaanili siulersuisut naalakkersuisoqarfik aningnaasaliisoqarnissaa pillugu ukiuni marlunni kingullerni qanimut oqaloqatigiissuteqarfigisarpaa, taamaammat qulakkeerneqarsimannginnera uissuumminarpoq, forstanderi allappoq.
Taassuma oqarnera naapertorlugu Ilinniartitaanermut Naalakkersuisoqarfiup siulersuisullu akornanni ilinniarfiit 2019-imi aggustimi aallartinnissaat pillugu 2017-imi novembarimi isumaqatigiissusiortoqarnikuuvoq.
Ilinniarfissani ilinniartussat tamarmik arfiniliusut
Ilinniarfiup siulersuisuisa susoqarsimanera qulaajarniarlugu ilinniarfiillu piaarnerpaamik aallartinnissaat qulakkeerniarlugu Ilinniartitaanermut Naalakkersuisumut, Ane Lone Baggerimut manna saaffiginnissuteqarput.
Ane Lone Baggerip pisoq aamma maanna misissuiffigilerpaa.
- Qanorpiaq pisoqarsimanera maanna misissorneqarpoq, siunissami taamatut pisoqaqqinnginnissaa qularnaarniarlugu. Uannut Naalakkersuisutut pingaaruteqarluinnartuuvoq inatsisit maleruarneqarlutillu ataqqineqarnissaat, taamaammallu uannut pingaarnerpaavoq, pineqartup iluani malittarisassat tamanut atuuttussamik erseqqissarneqarnissaat, Ane Lone Bagger oqarpoq.
Ilinniarfinni marlunni katillugit aqqaneq marluk tassa ilinniakkami ataatsimi arfinillit ilinnialertussaagaluarput.
