Neqinik qanganitsertunik nassaartoqaqqippoq

Danmarkimi inuussutissaqarnermut aqutsisoqarfiup neqit qanganitsertut quersuarni nassaavi amerleqqipput:

Inuussutissaqarnermut aqutsisisoqarfimmi sulisut qoqassiillutik Slagelsemi quersuarnik qaammatip uuma aallartilaarnerani misissuinerminni nassaavi makkuupput: Qeerlutuut illinnarnerarlugit pisiniarfinni tunineqartussat meqqii, ullormik tunineqarfissaanik kingullermik allagartallit, kiliorlugit piiaaffigineqarsimasut nassarineqarput. Taakkulu qaavanni erseqqilluinnartumik nutaamik ullulersorneqarnissaanik naalakkiut nipitinneqarsimasoq aamma takuneqarsinnaalluni. Biilit issiavikui tuttuusallu nassui nerisassat akornanni nassaarineqarput.

Radikalet folketingimi inuussutissat pillugit oqaaseqartartuat tupaallassimavoq:

- Allaanngivippoq quit qerititsiviillu sumut atorneqartussat ilisimanittoqanngitsoq – nerisassanik ingammik pisiniarfinni tunineqartussanik suliaqartut sakkortunerpaamik taakku immikkooruteqarnerinik paasitinneqartariaqarput. Nassaat ataatsimoortinneqarsimaneri akuerineqarsinnaanngilluinnarpoq, Radikalet folketingimi inuussutissat pillugit oqaaseqartartuat oqarpoq.

Poortuutikut nerisassallu tunineqarsinnaanngitsutut nalunaaqutsikkat aamma nassaarineqarput.

Inuussutissaqarnermut ministeri socialdemokratinit suliniutikippallaartutut suaarutigineqarpoq:

- Sipaarniarluni aningaasaliissutit ilanngarnerisa kingunerisaanik pissutsit ajorteriartartut uppernarseqqipparput. Uanilu inuussutissanut ministeri pisuulluinnarpoq, Radekalet oqaaseqartartuat oqarpoq.

Tamatumunnga inuussutissaqarnermut ministeri Lars Barfoed oqarpoq:

- Nerisassat pisiniarfinni tunineqartussat nakkutigineqarneri sakkortusaaffiginiarlugu immikkut tapiissutinik ukioq manna aningaasaqarnermut ataatsimiititaliamit tunineqarpunga. Peqquserluttuliortartut sakkortunerusumik pineqaatissinneqartarnissaa anguniarlugu maanna Folketingimi siunnersuuteqarpunga, Atuisunut ministeri Lars Barfoed naggasiivoq.