Nanortalimmi inuit atsiornernik katersipput, innuttaasunulli ataatsimiititsinermut takkunnatik
Nanortalimmi innuttaasut eqimattat pingaarnersiuinermi kingulliunneqartarsorisut aalajangiisussaagaluarunik Nanortalik nammineq kommuneqaleqqissaaq.
Taamaammat taakku Nanortalimmi eqqaanilu innuttaasut aamma taama kissaateqartut atsiornerinik katersillutik aallartipput.
Kommune Kujallermi borgmesteri, Stine Egede taama oqallittoqaleruttortoq Nanortalimmi innuttaasunik ataatsimiititsivoq.
Taassumali atsiornernik katersisunik takkuttoqannginnera uggoraa. Ataatsimiititsinermut takkuttut 60-it missaanniipput.
-Maanngaleratta inuit 500-t taaneqarput atsiorsimasut. Taava uanga naatsorsuutigigaluarpara katersortarfik ulikkaavillugu inuit aggikaassasut, isummaminnik apuussiartorlutik, Stine Egede KNR Radiomut oqarpoq, nangillunilu:
- Taanna nassuerutigissavara puaatsoornarpoq uannut.
Innuttaasunik ataatsimiisitsinermut takkuttut illoqarfimmi qanoq ineriartortitsisoqarniarneranik pingaarnertut apeqqutissaqarput.
Nanortallillu eqqanilu nunaqarfiit kommunimit anerusunnerannut ineriartortitsisoqannginnera tunngavilersuutit ilagaat.
Susassaqarfimmi suliffimmi misiliisut akissarsiakkaallu
Kommunalbestyrelsip qanoq allatut iliorsinnaanissaanik tusarniaanissaq innuttaasunik ataatsimiititsinerup siunertaraa.
Avissaarnissamut tunngavilersuuteqartoqanngilaq, kisianni borgmesterimut apeqqutit kissaatillu arlallit oqaatigineqarput.
Nanortalimmi allaffeqarfimmi ilinniartunik amerlanerusunik suliffimmik misiliisoqalernissaa ilaatigut kissaatigineqarpoq. Aamma kommunimi atorfiit akissarsiaqarfiunerusut amerlassusiisa Nanortalimmut Narsamullu qanoq siammarterneqarsinnaanerat eqqaaneqarpoq.
Stine Egedep kommunerujussuit 2009-mi pilersinneqarneraniilli Nanortalimmi allaffeqarfimmi sulisut qanoq ineriartorsimanerat misissorniarlugu neriorsuutigaa.
Kommune tusagassiuutinut nalunaarummi allappoq.
Kommune Kujallermi Siumumit kommunalbestyrelsimut ilaasortaq Anders Olsen Nanortalimmeersoq innuttaasunut taasititsisoqarnissaanut siunnersuuteqaqqammerpoq.
Kommunalbestyrelsip sapaatip akunnerani matumani ataatsimiinnerminni tamanna isummerfigineqassaaq.
- Anders Olsenip oqallisissiaa Nanortalimmut tunngasoq aamma suliarisussaavarput. Tassani oqallinneq sumut sammiveqassanersoq takussavarput, aamma taassuma kingorna alloriaqqinnissaq qanoq ikkumaarnersoq piffissap takutikkumaarpaa, Stine Egede oqarpoq.
