Nanortalik namminerisamik kommuneqalerusuttoq

Nanortalimmi eqqaanilu inuit atsiornernik katersileruttorput. Taakku Nanortallip nammineq kommuneqaleqqinnissaa Kommune Kujalliullu inuulluaqqunissaa anguniarpaat.

Tamanna kommunalbestyrelsimi Anders Olsenip ammaffigaa. Taanna Siumumit kommunalbestyrelsimut ilaasortaavoq – Inatsisartunilu ilaasortaalluni.

- Isumaqarpunga soorunami tusaanngitsuusaarnagulu isiginngitsuusaartariaqanngikkipput innuttaasut taama qisuariaateqarnerat, taanna oqarpoq.

Kommune Kujallermi innuttaasut januaarip aallaqqaataani ukioq kingulleq katillugit 6.205-iupput. Taakkunannga Nanortalimmi eqqaanilu nunaqarfinni tallimaasuni innuttaasut 1.533-upput.

Ippassaq tikillugu atsioreersimasut 500-t sinneqarput. Tamannalu Anders Olsenimit soorunami maluginiarneqarpoq.

- Ingammik paasillugu atsiorsimasut qanoq amerlatiginersut, assut soorunami eqqarsajallannaqaaq innuttaasut Nanortalimmi nunaqarfittaanilumi aamma namminerisamik kommuneqaqqilerusunnermik oqariartuuteqarnerat. Tassuunakkut isumaqarpunga annertoorujussuaq ersersinneqartoq, taanna oqarpoq.

Taasititsisoqarnissaa siunnersuutiginiaraa

Kommune Kujallermi kommunalbestyrelse ukioq manna siullermeerluni februaarip 14-iani ataatsimiittussaavoq. Tassani Nanortalimmi eqqaaniilu nunaqarfinni tallimaasuni innuttaasut apeqqut pillugu taasitinneqarnissaannik Anders Olsen siunnersuuteqarniarpoq.

- Neriuppunga taanna kommunalbestyrelsimi uummaarissumik oqaluuserineqassasoq kissaatigisorujussuuara, taanna oqarpoq.

Nanortalik immikkut kommuninngortariaqarnersoq Anders Olsenip maanna isummerfigerusunngilaa. Innuttaasut taasitinneqareerpata qanoq ingerlariaqqinnissaq pillugu aatsaat isummaminik saqqumiussaqarusuppoq.

- Qulakkiivillugu qulakkeerusuppara ilumut amerlanerussuteqarluartut imaluunniit amerlanerussuteqartut taama isumaqarpat, taanna oqarpoq.

Nanortalimmi innuttaasut atsiornernik tunniussaqarnissaat Kommune Kujallermi borgmesterip Stine Egedep (IA) qilanaarinerarpaa. Immikkut kommuningorniarnermi kissaateqartut suliaritikkusutaat suliassatut allatulli suliarineqassasoq, taanna aamma allakkatigut akissuteqarpoq.

Maniitsoq aamma avissaarusuttoq

Illoqarfiit ilorrisimaannginnertik pissutigalugu kommuneqarisaminnik avissaarusunnerat siulliunngilaq.

Maniitsoq Qeqqata Kommunianut siorna maajimi ilaarusukkunnaarpoq.

Illoqarfimmi innuttaasut kommunip pilersaarutaanik tusagaqanngisaannarnertik ilorrisimaarutiginagu tunngavilersuutigaat. Aammattaaq sumilluunniit paasitinneqartarsimanatik oqaatigaat.

Atsiornernillu katersititsineq aallartinneqarpoq - tamannali itigartitsissutigineqarpoq.

Kommunalbestyrelsimi oqallittoqarnerata kingorna borgmesterip, Malik Berthelsenip (Siumut) siunnersuut itigartitsissutigineqartoq KNR-imut oqaatigaa. Maniitsumiimmi ilaasortaq ataasiinnaq, tassalu Karl Lyberth partii Naleqqamit kisimi akuersisuummat.

Tunumi Kommuneqarfik Sermersuumit avissaarnissaq aamma oqallisigineqallattaasarpoq.