Mala Høy Kúko: Tasiilaq kommunimiit anissaaq

Oqallissutaasartoq uteqqiasoq - akuttunngitsumik takkuttartoq tassaavoq: Tasiilaq illoqarfiit pingaarnersaata kommunianit anissanersoq immikkullu Nunatta kangiani kommuninngussanersoq.

Anguniagassatut saqqqummeqqittoq, Siumut sinnerlugu Kommuneqarfik Sermersuumi ilaasortap Mala Høy Kúko-p siunnersuutigaa.  

Tasiilami nunaqarfiinilu innuttaasut Tasiilap namminersulerluni Kommuneqarfik Sermersuumiit aninissaa taasissutigissagaat piumasaraa. 

Mala Høy-Kúko nammineq Tasiilameersuuvoq. 

- Taamatut Tasiilaq kommunerujussuup ataaniitsillugu naammaginanngitsumik ineriartorujuuginnassappat siunissami naatsorsuutigineqassavoq innuttaasut inuusuttaminnut ilinniarsimassutsikkut naammassigaluarlutik periarfissaasuaneq peqqutaatillugu allanut illoqarfinnut nutsertuarnissaa.

Tusagassiorfinnut nalunaarummini allappoq imalu nangilluni. 

- Ukiunimi arlaqalersuni tamanna nunaqqataasut misillerfigereernikuuaat sukkasuumik, iliuuseqartoqanngippallu suli nangittumik nutserneq ingerlanneqassalluni. Taamaammat siunnersuutigaara Tasiilami nunaqarfittaanilu innuttaasuusut aperineqartariaqartut qanoq illoqarfittut nunaqarfittatillu eqqarsaatigalugit ineriartoqqissagunik immikkut kommunitut inissisimalernissartik eqqarsaatigineraat.

Tunu Kitaaluunniit

Siumumeersoq alla Tunup Kitaatalu oqallisigineqarnissaannik siorna siunnersuuteqarpoq, tassalu Lars Poulsen, Kulusumeersoq. 

Inatsisartut ukiaanerani ataatsimiinneranni Tunup namminerisaminik kommuneqalernissaa Naalakkersuisunut siunnersuutigaa, taannali itigartinneqarpoq. 

Politikerit kissaataat ataasiuvoq, Allaavorli ilisimatusarneq. Sermersuummi kisimi Nunatta kitaa kangialu avissaaqqatinngilai.

Ulunnguaq Markussen, ph.d.-nngorniarluni Ilisimatusarfimmi ilisimatusaatimini Nunatta kangiani Tunumi najugallit sammivai.

Nammineq Kitaamiuuvoq, ph.d.-nngorniutimili suliarinerani Tunumiissimalluni. 

Ilisimatusartoq: Naligiinnginnerujussuaq

Tunumiinnermini nunaqavissut apersorpai, paasillugulu tunumiut ulluinnarni atukkatik  unammillernartutut ineriartorfiunngitsutullu misigisimagaat.

Ulunnguaq Markussenip aamma paasivaa Tunumiut Kitaaniit ajattugaasutut politikkikkullu sunniuteqarsinnaassutsikkut killeqartutut misigisimasartut.

Oqarnera naapertorlugu, tunumiut inuiannut kalaallinut ilaasutut misigisimanngillat.

Ileqqui oqaluttuaataat oqaasiilu allaanerupput.

Oqaatsillu aporfiujuartut oqaatigaa.  

- Kalaallit Nunaanni oqaatsit akuerineqartut tassaapput kitaamiusut oqaatsit, tamannalu assisiinngisitsinerujussuusoq, ilisimatusartup KNR-imut marsi qaammat oqaatigaa.